ພະແນກແຜນການ ແລະ ການລົງທຶນ ແຂວງບໍລິຄຳໄຊສົມທົບກັບບໍລິສັດກຸ່ມດວງຈະເລີນພັດທະນາກໍ່ສ້າງ ຈຳກັດ ໄດ້ຈັດພິທີເຊັນສັນຍາຄຸ້ມຄອງໂຄງການເຂື່ອນໄຟຟ້ານ້ຳຕົກຂະໜາດນ້ອຍ ນ້ຳຈາດ 1 ເມືອງໄຊຈຳພອນແຂວງບໍລິຄຳໄຊຂຶ້ນໃນວັນທີ 6 ເມສານີ້ ທີ່ພະແນກແຜນການ ແລະການລົງທຶນແຂວງ ໂດຍຕາງໜ້າການເຊັນສັນຍາແມ່ນທ່ານ ພອນທິລາດ ສິດສາທອນ ຫົວໜ້າພະແນກແຜນການ ແລະ ການລົງທຶນແຂວງກັບທ່ານ ຄຳຜາຍ ສີລາຊາ ປະທານບໍລິສັດກຸ່ມດວງຈະເລີນ ພັດທະນາກໍ່ສ້າງ ຈຳກັດ ໂດຍມີຫົວໜ້າ ພະແນກພະລັງງານ-ບໍ່ແຮ່ ແລະຫົວໜ້າ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງເຊັນຮ່ວມເປັນສັກຂີພະຍານ ໂດຍຊ້ອງໜ້າທ່ານ ດຣ. ກອງແກ້ວ ໄຊສົງຄາມ ເຈົ້າແຂວງໆບໍລິຄຳໄຊ, ຫົວໜ້າພະແນກການທີ່ກ່ຽວຂ້ອງພະນັກງານ, ວິຊາການທັງສອງຝ່າຍເຂົ້າຮ່ວມ.
ໂຄງການກໍ່ສ້າງເຂື່ອນໄຟຟ້ານ້ຳຕົກຂະໜາດນ້ອຍນ້ຳຈາດ 1 ຕັ້ງຢູ່ເມືອງໄຊຈຳພອນ ແຂວງບໍລິຄຳໄຊ ໂຄງການນີ້ ເປັນເຂື່ອນໄຟຟ້າຂະໜາດນ້ອຍ, ສາມາດຕິດຕັ້ງເຄື່ອງຈັກຜະລິດໄຟຟ້າໄດ້ປະມານ 14,8 ເມກາວັດຜ່ານມາແຂວງໄດ້ເຊັນບົດບັນທຶກ (MOU) ໃນຄັ້ງວັນທີ 14 ພຶດສະພາ 2014 ໃຫ້ບໍລິສັດດັ່ງກ່າວເປັນຜູ້ລົງທຶນໃນການລົງເກັບກຳຂໍ້ມູນທາງດ້ານພູມມີສາດ, ອຸທົກກະສາດ, ສັງຄົມ ແລະຄິດໄລ່ຜົນຕອບແທນທາງດ້ານເສດຖະກິດພ້ອມສ້າງບົດວິພາກເສດຖະກິດ-ເຕັກນິກຂອງໂຄງການໄດ້ສຳເລັດ ແລະໄດ້ຜ່ານຂະແໜງການທີ່ກ່ຽວຂ້ອງພ້ອມໄດ້ຮັບຮອງ FS ຈາກພະແນກພະລັງງານ ແລະບໍ່ແຮ່, ໂດຍມູນຄ່າໃນການລົງທຶນກໍ່ສ້າງ 224 ຕື້ກີບປະມານ 28 ລ້ານໂດລາສະຫະລັດຈະໃຊ້ເວລາກໍ່ສ້າງ 3 ປີໃຫ້ສຳເລັດ, ໄຟຟ້າທີ່ຜະລິດໄດ້ແມ່ນລາຍຮັບໃຊ້ພາຍໃນທັງໝົດ ແລະຈະສ້າງລາຍຮັບທ້ອງຖິ່ນກໍ່ຄືບໍລິສັດ ແລະເປັນການຕອບສະໜອງໄຟຟ້າໃຫ້ແກ່ປະຊາຊົນຢ່າງພຽງພໍ ສະນັ້ນ ເພື່ອແນໃສ່ການ ຈັດຕັ້ງປະຕິບັດໂຄງການດັ່ງກ່າວໄດ້ດຳເນີນໄປຢ່າງຖືກຕ້ອງຕາມລະບຽບກົດໝາຍ ແລະທ່ວງທັນເວລາ, ພະແນກການທີ່ກ່ຽວຂ້ອງສົມທົບກັບບໍລິສັດຜູ້ລົງທຶນຈັດພິທີເຊັນສັນຍາດັ່ງກ່າວນີ້ຂຶ້ນເພື່ອເປັນຫຼັກຖານ.
ທີ່ມາ: