ສຳນັກຂ່າວຕ່າງປະເທດລາຍງານວ່າ ເກີດເຫດເຮືອບິນໂດຍສານສາຍການບິນບຣິດທິຊ ແອເວ ຮຸ່ນ A320 ທີ່ເດີນທາງຈາກນະຄອນເຈນີວາຂອງສະວິດເຊີແລນໄປຍັງສະໜາມບິນຮິດໂທຣ ໃນນະຄອນຫຼວງຂອງອັງກິດ ປະສົບອຸບັດຕິເຫດຕຳກັບອາກາດສະຍານບໍ່ມີຄົນຂັບຂະໜາດນ້ອຍ ຫຼື ໂດຣນ ຂະນະລົງຈອດທີ່ສະໜາມບິນ ເມື່ອວັນອາທິດທີ່ຜ່ານມາ (17 ເມສາ) ຕາມເວລາທ້ອງຖິ່ນ.
ລາຍງານລະບຸວ່າ ນັກບິນສາມາດນຳເຄື່ອງລົງຈອດໄດ້ແບບປອດໄພ ໂດຍເຮືອບິນລຳດັ່ງກ່າວໄດ້ຮັບຄວາມເສຍຫາຍເລັກນ້ອຍ ແລະບໍ່ມີຜູ້ໃດໄດ້ຮັບບາດເຈັບ.
ດ້ານການບິນພົນລະເຮືອນຂອງອັງກິດ ເປີດເຜີຍວ່າ ກຳລັງສືບຫາຜູ້ກໍ່ເຫດຢ່າງເຕັມທີ່ ເນື່ອງຈາກການບັງຄັບໂດຣນໃກ້ບໍລິເວນສະໜາມບິນນັ້ນເປັນເລື່ອງຜິດກົດໝາຍຮ້າຍແຮງເຖິງຂັ້ນເຂົ້າຄຸກ.