ສຳນັກຂ່າວຕ່າງປະເທດ ລາຍງານໃນວັນທີ 18 ເມສານີ້ວ່າ ເຈົ້າໜ້າທີ່ທະຫານ ແລະ ເຈົ້າໜ້າທີ່ປາບປາມຢາເສບຕິດໄທ ສາມາດຈັບກຸມຊາວມາເລເຊຍ 1 ຄົນ ຄາດ່ານຊາຍແດນສະເດົາ ແຂວງສົງຂາ ທາງພາກໃຕ້ຂອງປະເທດໄທ ພ້ອມກັບຂອງກາງ ກັນຊາອັດແທ່ງ ຈຳນວນ 29 ເປົາ ນ້ຳໜັກລວມ 520 ກິໂລ ມູນຄ່າກວ່າ 15 ລ້ານບາດ ເຊື່ອງມາພາຍໃນລົດຂົນເຄື່ອງເຟີນິເຈີ ເພື່ອຈະເດີນທາງອອກໄປຍັງປະເທດມາເລເຊຍ ແຕ່ຖືກເຈົ້າໜ້າທີ່ສົງໄສ ແລະ ໃຊ້ເຄື່ອງເອັກສະເຣກວດພົບດັ່ງກ່າວ.

ຈາກການສືບສວນພົບວ່າ ກັນຊາທັງໝົດ ແມ່ນຖືກຂົນມາຈາກເມືອງຫາດໃຫຍ່ ແຂວງສົງຂາ ໂດຍມີປາຍທາງທີ່ ນະຄອນຫລວງກົວລາລຳເປີ ປະເທດມາເລເຊຍ ໂດຍຜູ້ກ່ຽວໄດ້ຮັບຄ່າຈ້າງ ຄັ້ງລະ 1,000 ໂດລາ ພ້ອມຮັບສາລະພາບວ່າ ເຮັດມາແລ້ວເປັນເທື່ອທີສາມ.