ກະຊວງ​ການ​ຕ່າງປະເທດ ຈັດ​ພິທີ​ມອບ-ຮັບ​ເຄື່ອງ​ຊ່ວຍເຫຼືອລ້າ​ຈາກ​ລັດຖະບານ ​ສປ ຈີນ ໃຫ້ແກ່ ​ສປປ ລາວ ເພື່ອ​ຮັບ​ໃຊ້ການ​ເປັນ​ເຈົ້າພາບ ແລະ ປະທານ​ອາ​ຊຽນ ປີ 2016 ຂຶ້ນ​ໃນວັນ​ທີ 8 ເມສາ 2016 ທີ່​ຫໍ​ປະຊຸມ​ແຫ່ງ​ຊາດ (NCC) ຕາງໜ້າໃຫ້​ແກ່​ລັດຖະບານ ​ສປ ຈີນ ມອບໂດຍ​ທ່ານ Guan Huabing ເອກ​ອັກ​ຄະ​ລັດ​ຖະ​ທູດ ແຫ່ງ ​ສປ ຈີນ ປະຈຳ​ລາວ ແລະ ຮັບໂດຍ​ທ່ານນາງ ຄຳ​ເພົາ ເອີນ​ທະວັນ ຮອງ​ລັດຖະມົນຕີ​ກະຊວງການ​ຕ່າງປະເທດ ມີ​ພະນັກງານທີ່​ກ່ຽວຂ້ອງ​ທັງ​ສອງ​ຝ່າຍ ​ເຂົ້າຮ່ວມ​ເປັນ​ສັກຂີ​ພິຍານ.

ເຄື່ອງ​ທີ່​ນຳ​ມາ​ມອບ​ຄັ້ງ​ນີ້ ປະກອບ​ມີ​ລົດ​ຈິບ (ຍີ່ຫໍ້ DONGFENG SUV) ຈຳນວນ 10 ຄັນ ລົດ​ເກງ (ຍີ່ຫໍ້ BYD SEDAN G6) ຈຳນວນ 20 ຄັນ ເຄື່ອງ X-Ray ກວດ​ຄວາມ​ປອດ​ໄພ ຈຳນວນ 4 ເຄື່ອງ ຄອມ​ພີວ​ເຕີ​ຕັ້ງ​ໂຕະ​ຈຳນວນ 150 ໜ່ວຍ ຄອມ​ພິວ​ເຕີແບບ​ພົກ​ພາ (Laptop) ຈຳນວນ 100 ໜ່ວຍ ແລະ ອຸປະກອນ​ຮັບໃຊ້​ຈຳນວນ​ໜຶ່ງ ເຄື່ອງ​ດັ່ງກ່າວ ຈະ​ນຳ​ໃຊ້​ເຂົ້າ​ໃນ​ການ​ກະກຽມວຽກ​ງານ​ດ້ານ​ຕ່າງໆ​ໃນ​ການເປັນ​ເຈົ້າພາບ ແລະ ປະທານ​ອາຊຽນ​ຂອງ ​ສປປ ລາວ 2016 ເປັນການ​ປະກອບສ່ວນ​ອັນ​ສຳຄັນ ເພື່ອ​ເຮັດ​ໃຫ້ການ​ເປັນ​ປະທານອາ​ຊຽນ​ຂອງ ​ສປປ ລາວ ມີ​ຜົນສຳເລັດ​ຢ່າງ​ຈົບງາມ.

ໃນ​ໂອກາດ​ນີ້ ທ່ານ​ນາງ ຄຳ​ເພົາ ເອີນ​ທະ​ວັນ ໄດ້​ຕາງໜ້າໃຫ້​ລັດຖະບານ ​ສປປ ລາວ ສະແດງ​ຄວາມ​ຂອບໃຈ​ຢ່າງ​ຈິງ​ໃຈ​ຕໍ່ລັດຖະບານ ​ສປ ຈີນ ທີ່​ໄດ້​ສືບຕໍ່ໃຫ້ການ​ສະໜັບສະໜູນ ແລະ ຊ່ວຍເຫຼືອ​ຕະຫຼອດ​ມາ.

ແຫລ່ງຂ່າວ: