ຂປລ. ຕອນບ່າຍວັນທີ 11 ເມສາ ນີ້, ການນຳພັກ-ລັດ ເຊິ່ງປະກອບມີສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ແລະ ສະຫາຍ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຄຳນັບຂອງສະຫາຍ ດິງເຖຮິ່ງ ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກກອມມູນິດ ຫວຽດນາມ ພ້ອມຄະນະ ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແຕ່ວັນທີ 11-13 ເມສາ ນີ້.
ໃນໂອກາດນີ້, ຜູ້ນໍາເຮົາຕ່າງກໍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການມາຢ້ຽມຢາມ ສປປ ລາວ ຢ່າງເປັນທາງການຂອງສະຫາຍ ດິງເຖຮິ່ງ ພ້ອມຄະນະ ເຊິ່ງເປັນການປະກອບສ່ວນອັນສຳ ຄັນເຂົ້າໃນການເພີ່ມທະວີ ສາຍພົວພັນມິດຕະພາບອັນເປັນມູນເຊື້ອຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ກວ້າງຂວາງ ແລະ ແຕກດອກອອກຜົນຍິ່ງຂຶ້ນ. ພ້ອມທັງໄດ້ຕີລາຄາການພົວພັນຮ່ວມມື ລາວ-ຫວຽດນາມ ໃນໄລຍະຜ່ານມາ ແລະ ໄດ້ສະແດງຄວາມຮູ້ບຸນຄຸນຕໍ່ພັກ, ລັດຖະບານ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫລືອອັນໃຫຍ່ຫລວງ, ລ້ຳຄ່າແກ່ປະຊາຊົນລາວ ມາໂດຍຕະຫລອດ. ພັກ, ລັດຖະບານ ແລະ ປະຊາຊົນລາວ ຈະເຮັດສຸດຄວາມສາມາດຂອງຕົນຮ່ວມກັບ ພັກ, ລັດຖະບານຫວຽດນາມ ເພື່ອປົກປັກຮັກສາ ແລະ ເພີ່ມພູນຄູນສ້າງສາຍພົວພັນມິດຕະພາບ, ຄວາມສາມັກຄີແບບພິເສດ ລາວ-ຫວຽດນາມ ໃຫ້ນັບມື້ໄດ້ຮັບການເສີມຂະຫຍາຍເຂົ້າສູ່ລວງເລິກ, ແທດຕົວຈິງ ແລະ ມີປະສິດທິຜົນໃນທຸກຂົງເຂດວຽກງານ ເພື່ອຜົນປະໂຫຍດຂອງປະຊາຊົນສອງຊາດ ເພື່ອສັນຕິພາບ, ການຮ່ວມມື ແລະ ພັດທະນາໃນພາກພື້ນ ແລະ ໃນໂລກ.
ສະຫາຍ ເລຂາທິການໃຫຍ່ ບຸນຍັງ ວໍລະຈິດ ຍັງໄດ້ຝາກຄຳຢື້ຢາມຖາມຂ່າວ ອັນສະໜິດສະໜົມເຖິງ ສະຫາຍ ຫງວຽນຝູຈ້ອງ ເລຂາທິການໃຫຍ່, ສະຫາຍ ເຈີນດາຍກວາງ ປະທານປະເທດ ແລະ ບັນ ດາສະຫາຍການນຳຂັ້ນສູງຂອງພັກ, ລັດຖະບານຫວຽດນາມ ແລະ ຕອບຮັບຄຳເຊີນຂອງສະຫາຍເລຂາ ທິການໃຫຍ່ ຫວຽນຝູຈ້ອງ ແລະ ສະຫາຍ ເຈີນດາຍກວາງ ປະທານປະເທດ ແຫ່ງ ສສ ຫວຽດນາມ ທີ່ຈະໄປຢ້ຽມຢາມ ສສ ຫວຽດນາມ ໃນເວລາທີ່ເໝາະສົມ.
ໃນໂອກາດດຽວກັນ, ສະຫາຍ ດິງເຖຮິ່ງ ກໍໄດ້ສະແດງຄວາມຂອບອົກຂອບໃຈເປັນຢ່າງສູງ ທີ່ຜູ້ ນຳພັກ-ລັດຂອງລາວ ໄດ້ສະຫລະເວລາຕ້ອນຮັບຄະນະຜູ້ແທນໃນຄັ້ງນີ້ ແລະ ໄດ້ນຳເອົາຄວາມຢື້ຢາມຖາມຂ່າວ ແລະ ອວຍພອນປີໃໝ່ລາວ ຈາກຜູ້ນຳພັກ, ລັດ ແລະ ການນຳຂັ້ນສູງຂອງ ສສ ຫວຽດນາມ ມາຍັງບັນດາຜູ້ນຳພັກ, ລັດ ແລະ ການນຳຂັ້ນສູງຂອງລາວ. ພ້ອມທັງແຈ້ງໃຫ້ຊາບເຖິງຜົນການພົບປະສອງຝ່າຍ ກັບ ສະຫາຍ ພັນຄຳ ວິພາພັນ ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກ ປປ ລາວ ພ້ອມດ້ວຍຄະນະ.
ໃນຕອນເຊົ້າວັນທີ 12 ເມສາ 2016 ນີ້ ທີ່ສະພາແຫ່ງຊາດ ສະຫາຍນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ກໍໄດ້ຕ້ອນຮັບການເຂົ້າຢ້ຽມຄຳນັບຂອງສະຫາຍ ດິງເຖຮິ່ງ ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກກອມມູນິດ ຫວຽດນາມ ພ້ອມຄະນະເຊັ່ນດຽວກັນ.
ແຫລ່ງຂ່າວ:
