ທີ 7 ເມສາ ຜ່ານມາ ທ່ານ ພົງສະຫວັນ ສິດທະວົງ, ເຈົ້າແຂວງໄຊຍະບູລີ ພ້ອມດ້ວຍຄະນະໄດ້ມອບເຄື່ອງຊ່ວຍເຫຼືອບັນເທົາທຸກໃຫ້ແກ່ຄອບຄົວທີ່ປະ ສົບເຄາະຮ້າຍຈາກໄຟໄໝ້ທີ່ຫ້ອງການ ບ້ານຫ້ວຍຈ້ວງ ເມືອງຫົງສາ ແຂວງໄຊຍະບູລີ.
ທ່ານ ຄຳເພັດ ພົມມະລາດ ວ່າການເຈົ້າເມືອງໆຫົງສາໄດ້ລາຍງານວ່າ: ໃນ ເວລາ 18-19 ໂມງຂອງວັນທີ 6 ເມສາ 2016 ຢູ່ບ້ານດັ່ງກ່າວໄດ້ມີໄຟລາມປ່າມາໄໝ້ເຮືອນຂອງປະຊາຊົນຈຳນວນໜຶ່ງຢູ່ພາຍໃນບ້ານ, ສາເຫດທີ່ເກີດອັກຄີໄພໄຟໄໝ້ໃນຄັ້ງນີ້ແມ່ນການຈູດໄຮ່ຂອງປະຊາຊົນພາຍໃນບ້ານເອງໄດ້ຮັບຜົນເສຍຫາຍທັງໝົດ 27 ຄອບຄົວ, ປະກອບມີ: ເຮືອນ, ລົດຊີ້ງ, ລົດຈັກ, ໂຮງສີເຂົ້າ, ສັດລ້ຽງຈຳນວນໜື່ງ ແລະອື່ນໆ. ຄາດຄະເນຜົນເສຍຫາຍໃນເບື້ອງຕົ້ນປະມານ 3 ຕື້ກວ່າກີບ.
ຈາກນັ້ນໃນພິທີ ທ່ານ ພົງສະຫວັນ ສິດທະວົງ, ກໍໄດ້ມອບເຄື່ອງບັນເທົາທຸກເປັນຕົ້ນແມ່ນເຄື່ອງອຸປະໂພກບໍລິໂພກ, ເຄື່ອງນຸ່ງຫົ່ມ, ເຄື່ອງໃຊ້ສອຍ, ເຂົ້າສານ ແລະອື່ນໆ ນອກນິ້ຍັງມີບັນດາພະແນກການ, ຫ້ອງການ, ນັກທຸລະກິດ, ເມືອງໄຊຍະບູລີ, ເມືອງຫົງສາຕະຫຼອດຮອດຜູ້ປະກອບການກໍໄດ້ມອບເຄື່ອງຊ່ວຍ ເຫຼືອບັນເທົາທຸກໃນຄັ້ງນິ້ຕື່ມອີກລວມມູນຄ່າຫຼາຍກວ່າ 40 ລ້ານກີບ, ໂດຍມີທ່ານວ່າການເຈົ້າເມືອງໆຫົງສາ ແລະປະຊາຊົນທີ່ຖືກປະສົບເຄາະເປັນຜູ້ກ່າວຮັບ.