ພີ່ນ້ອງຊາວລາວຢູ່ພາຍໃນ ແລະ ຕ່າງປະເທດ ທີ່ຮັກແພງທັງຫຼາຍ.
ເນື່ອງໃນໂອກາດສົ່ງທ້າຍປີເກົ່າ ປີມະແມ ພສ 2558 ແລະ ຕ້ອນຮັບປີໃໝ່ ປີວອກ ພສ 2559 ຂ້າພະເຈົ້າມີຄວາມປິຕິຊົມຊື່ນເປັນຢ່າງຍິ່ງ ຂໍສົ່ງພອນໄຊອັນປະເສີດ ມາຍັງພີ່ນ້ອງຊາວລາວ ຢູ່ພາຍໃນປະເທດ ແລະ ຕ່າງປະເທດທຸກຖ້ວນໜ້າ ພ້ອມທັງຊາວຕ່າງດ້າວ ແລະ ຊາວຕ່າງປະເທດທີ່ດຳລົງຊີວິດ ແລະ ປະຕິບັດໜ້າທີ່ຂອງຕົນຢູ່ ສປປ ລາວ ຂໍໃຫ້ທຸກໆຄົນຈົ່ງມີແຕ່ຄວາມເບີກບານມ່ວນຊື່ນ ເພື່ອຕ້ອນຮັບປີໃໝ່ລາວ ທີ່ຈະມາເຖິງນີ້.
ປີມະແມ ພສ 2558 ເປັນປີທີ່ມີຄວາມສຳຄັນ ເປັນປະຫວັດສາດຂອງພວກເຮົາທົ່ວປວງຊົນລາວບັນດາເຜົ່າ ໄດ້ພ້ອມກັນສະເຫຼີມສະຫຼອງ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ ວັນຊາດທີ 2 ທັນວາ ຄົບຮອບ 40 ປີ ພັກປະຊາຊົນປະຕິວັດລາວ ໄດ້ດຳເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ສຳເລັດຜົນຢ່າງສະຫງ່າງາມໃນມໍ່ໆມານີ້ ໄດ້ສຳເລັດການປ່ອນບັດເລືອກຕັ້ງສະມາຊິກສະພາແຫ່ງຊາດ ຊຸດທີ VIII ແລະ ສະມາຊິກສະພາປະຊາຊົນຂັ້ນແຂວງ-ນະຄອນຫຼວງໃນທົ່ວປະເທດດ້ວຍ ບັນຍາກາດອັນຟົດຟື້ນ.
ທັງໝົດນີ້ແມ່ນເຫດການການເມືອງ ທີ່ເປັນປະຫວັດສາດຂອງຊາດລາວເຮົາ.
ປີມະແມທີ່ຜ່ານພົ້ນໄປ ເຖິງວ່າສະພາບຄວາມຫຍຸ້ງຍາກ ແລະ ອຸປະສັກຕ່າງໆ ໄດ້ສົ່ງຜົນກະທົບຕໍ່ປະເທດເຮົາໃນຫຼາຍດ້ານກໍ່ຕາມ ພາຍໃຕ້ການນຳພາຂອງພັກ-ລັດຖະບານປະຊາຊົນບັນດາເຜົ່າທົ່ວປະເທດ ໄດ້ເປັນເຈົ້າການຜ່ານຜ່າຄວາມຫຍຸ້ງຍາກ ສຸມໃສ່ແກ້ໄຂຄວາມທຸກຍາກຂອງປະຊາຊົນ ການປະຕິບັດເປົ້າໝາຍສະຫັດສະວັດ ຂອງອົງການສະຫະປະຊາຊາດ ການປະຕິບັດວຽກງານສາມສ້າງຢ່າງແຂງແຮງ ຢູ່ໃນຂອບເຂດທົ່ວປະເທດ ເຮັດໃຫ້ປະເທດມີສະຖຽນລະພາບທາງດ້ານການເມືອງໜັກແໜ້ນ ການພັດທະນາເສດຖະກິດ-ສັງຄົມ ໄດ້ສືບຕໍ່ຂະຫຍາຍຕົວຕໍ່ເນື່ອງ ການລົງທຶນຈາກພາຍໃນ ແລະ ຕ່າງປະເທດໄດ້ເພີ່ມຂຶ້ນ ລວມຍອດຜະລິດຕະພັນພາຍໃນມີອັດຕາເຕີບໂຕ ປະມານ 7,5% ສະເລ່ຍ ບັນລຸໄດ້ປະມານ 1.875 ໂດລາສະຫະລັດຕໍ່ຄົນຕໍ່ປີ ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການປັບປຸງຍົກລະດັບດີຂຶ້ນ ຄອບຄົວທຸກຍາກໄດ້ຫຼຸດລົງ ຍັງເຫຼືອປະມານ 6,9% ການພົວພັນຮ່ວມມືລະຫວ່າງ ສປປ ລາວ ກັບບັນດາປະເທດເພື່ອນມິດ ແລະ ອົງການຈັດຕັ້ງສາກົນ ໄດ້ສືບຕໍ່ຂະຫຍາຍຕົວຢ່າງກວ້າງຂວາງ ເຮັດໃຫ້ຖານະບົດບາດ ແລະ ອິດທິພົນຂອງ ສປປ ລາວ ນັບມື້ສູງຂຶ້ນໃນເວທີສາກົນ.
ພີ່ນ້ອງຮ່ວມຊາດທີ່ຮັກແພງທັງຫຼາຍ.
ປີວອກ ພສ 2559 ເປັນປີທຳອິດໃນການຈັດຕັ້ງປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກປະຊາຊົນປະຕິວັດລາວ ແລະ ປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ທັງເປັນການໝູນວຽນອາຊຽນ ເຊິ່ງ ສປປ ລາວ ຈະໄດ້ເປັນເຈົ້າພາບຈັດກອງປະຊຸມສຸດຍອດອາຊຽນ ແລະ ກອງປະຊຸມອື່ນໆຂຶ້ນ ໂດຍມີປະມຸກລັດ ຫົວໜ້າລັດຖະບານຈາກປະເທດຕ່າງໆໃນທົ່ວໂລກ ທີ່ມີການພົວພັນກັບປະຊາຄົມເສດຖະກິດອາຊຽນ ກໍ່ຈະເຂົ້າມາຮ່ວມກອງປະຊຸມສຸດຍອດອາຊຽນ ທີ່ຈະຈັດຂຶ້ນຢູ່ ສປປ ລາວ ພວກເຮົາໃນຕໍ່ໜ້ານີ້.
ດ້ວຍເຫດນີ້ ຂ້າພະເຈົ້າຮຽກຮ້ອງມາຍັງພີ່ນ້ອງຮ່ວມຊາດທຸກໆຄົນ ຈົ່ງພ້ອມພຽງກັນເພີ່ມທະວີຄວາມສາມັກຄີເປັນປຶກແຜ່ນແໜ້ນໜາ ພ້ອມກັນຜ່ານຜ່າຄວາມຫຍຸ້ງຍາກ ແລະ ສິ່ງທົດສອບທ້າທາຍທຸກປະການສູ້ຊົນປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ເພື່ອເຮັດໃຫ້ປະຊາຊົນບັນດາເຜົ່າຮັ່ງມີຜາສຸກ ປະເທດຊາດມັ່ງຄັ່ງເຂັ້ມແຂງ ສັງຄົມມີຄວາມສາມັກຄີປອງດອງປະຊາທິປະໄຕຍຸຕິທຳ ແລະ ມີຄວາມຮຸ່ງເຮືອງສີວິໄລ.
ໃນໂອກາດເລີກງາມຍາມດີມື້ຂຶ້ນປີໃໝ່ ຂ້າພະເຈົ້າຕາງໜ້າໃຫ້ການນຳຂອງພັກ-ລັດ ສປປ ລາວ ແລະ ໃນນາມສ່ວນຕົວ ຂໍສົ່ງພອນໄຊອັນປະເສີດ ມາຍັງພີ່ນ້ອງຊາວລາວທຸກຖ້ວນໜ້າທີ່ຢູ່ພາຍໃນ ແລະ ຕ່າງປະເທດ ຈົ່ງປະສົບແຕ່ຄວາມຜາສຸກໃນຊີວິດສ່ວນຕົວ ຄອບຄົວ ແລະ ມີຜົນສຳເລັດໃນໜ້າທີ່ວຽກງານ ຍາດໄດ້ໄຊຊະນະໃໝ່ຍິ່ງໃຫຍ່ກວ່າເກົ່າ.
ພິເສດ ຂ້າພະເຈົ້າກໍ່ຂໍຝາກຄວາມຢ້ຽມຢາມຖາມຂ່າວອັນອົບອຸ່ນ ມາຍັງພະນັກງານ ທະຫານ ຕຳຫຼວດ ພະນັກງານຮັບເບ້ຍບຳນານ ຜູ້ເສຍອົງຄະ ແລະ ປະຊາຊົນບັນດາເຜົ່າທຸກຖ້ວນໜ້າ ທີ່ກຳລັງຮັກສາປິ່ນປົວຢູ່ຕາມໂຮງໝໍແຫ່ງຕ່າງໆ ຈົ່ງຫາຍຈາກພະຍາດໂລຄາໂດຍໄວ ເພື່ອກັບຄືນເມືອຫາຄອບຄົວ ກົມກອງ ເພື່ອສືບຕໍ່ປະຕິບັດເຮັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດ.
ປີວອກ ພສ 2559 ຂໍໃຫ້ສິ່ງສັກສິດໃນໂລກນີ້ ດົນບັນດານໃຫ້ທຸກໆຄົນຈົ່ງມີແຕ່ຄວາມຢູ່ເຢັນເປັນສຸກ ປາສະຈາກພະຍາດໂລຄາທັງປວງ ປີໃໝ່ນີ້ຂໍໃຫ້ໄດ້ຮັບແຕ່ສິ່ງດີໆທຸກປະການເທີ້ນ.
ສະບາຍດີປີໃໝ່
ແຫລ່ງຂ່າວ:
