ຂປລ. ທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ ຢ້ຽມຢາມໂຮງງານຜະລິດຫົວອາຫານສັດ ຂອງບໍລິສັດ ຄວາມຫວັງໃໝ່ ໃນວັນທີ 7 ເມສາ ນີ້ ຢູ່ເຂດພັດທະນາ ກວມລວມໄຊເຊດຖາ ນະຄອນຫລວງວຽງຈັນ. ເຊິ່ງບໍລິສັດດັ່ງກ່າວ, ມີຄວາມສາມາດຜະລິດ ໄດ້ 30 ໂຕນຕໍ່ມື້ ແລະ ສາມາດສະໜອງໃຫ້ລູກຄ້າ ໃນນະຄອນຫລວງວຽງຈັນ, ແຂວງພາກກາງ ແລະ ແຂວງພາກໃຕ້.
ທ່ານ ລີເຄີ ອໍານວຍການ ບໍລິສັດ ຄວາມຫວັງໃໝ່ ໄດ້ລາຍງານໃຫ້ຊາບວ່າ: ບໍລິສັດຂອງພວກເຮົາ ໄດ້ສໍາເລັດ ການກໍ່ສ້າງໂຮງງານ ແລະ ຜະລິດຢ່າງເປັນທາງການ ໃນປີ 2014 ໂດຍລົງທຶນເບື້ອງຕົ້ນ 7 ລ້ານໂດລາສະຫະລັດ, ປັດຈຸບັນ ສາມາດຜະລິດໄດ້ 30 ໂຕນຕໍ່ມື້ ແລະ ຄາດວ່າຈະເພີ່ມປະລິມານ ການຜະລິດໃຫ້ໄດ້ 50 ໂຕນຕໍ່ມື້ ແລະ ຈະຂະຫຍາຍ ຕະຫລາດທົ່ວປະເທດໃນຕໍ່ໜ້າ. ເນື່ອງຈາກວ່າ ຄວາມຕ້ອງການຂອງລູກຄ້າ ຍັງສືບຕໍ່ເພີ່ມຂຶ້ນຢ່າງກວ້າງຂວາງ. ສໍາລັບໂຮງງານຜະລິດ ຫົວອາຫານຂອງພວກເຮົາ ແມ່ນຜະລິດຫົວອາຫານປາ ແລະ ໄກ່ ໂດຍກໍານົດລາຄາແຕ່ 98.000 ຫາ 123.000 ກີບຕໍ່ເປົາ.
ສປປ ລາວ ຍັງອາໃສການນໍາເຂົ້າ ອາຫານສັດ ຈາກຕ່າງປະເທດ ເປັນສ່ວນໃຫຍ່ ເຊັ່ນ: ໄທ, ຫວຽດນາມ ແລະ ສປ ຈີນ ເຊິ່ງບັນຫາດັ່ງກ່າວ, ໄດ້ເຮັດໃຫ້ ຜູ້ປະກອບການລ້ຽງສັດ ໄດ້ປະເຊີນກັບການເຮັດໃຫ້ ຕົ້ນທຶນການຜະລິດສູງຂຶ້ນ. ສະນັ້ນ, ປະເທດເຮົາແມ່ນໜຶ່ງໃນ 10 ປະເທດສະມາຊິກອາຊຽນ ທີ່ມີຄວາມອຸດົມສົມບູນ ທາງດ້ານແຫລ່ງວັດຖຸດິບ ຈາກທໍາມະຊາດ ເຊັ່ນ: ແຫລ່ງນໍ້າ, ເນື້ອທີ່ຜະລິດກະສິກໍາ, ການລ້ຽງສັດ ແລະ ອື່ນໆ ເຊິ່ງທັງໝົດເຫລົ່ານັ້ນ ສາມາດສ້າງ ກາລະໂອກາດເຮັດໃຫ້ທຸລະກິດ ການຜະລິດກະສິກໍາ, ການລ້ຽງສັດ ແລະ ການສົ່ງອອກ ເທົ່າທຽມສາກົນ ແລະ ພາກພື້ນ.
ແຫລ່ງຂ່າວ:
