ເມືອງຊຳເໜືອຈັດງານປະກວດນາງສາວຫົວພັນ

ຂປລ. ວັນທີ 7 ເມສາ 2016 ນີ້, ເມືອງຊຳເໜືອແຂວງຫົວພັນໄດ້ຈັດງານປະກວດນາງສັງຂານປະຈຳປີ ພ.ສ 2559 ຢູ່ທີ່ຫໍວັດທະນະທຳຂອງແຂວງໂດຍການເຂົ້າຮ່ວມເປັນປະທານຂອງທ່ານ ແສງຈັນ ລິນທະລາດ ຮອງເລຂາພັກເມືອງ, ຜູ້ຊີ້ນຳຂົງເຂດວຽກງານວັດທະນະທຳ-ສັງຄົມຂັ້ນເມືອງ, ມີບັນດາທ່ານການນຳເມືອງຊຳເໜືອ, ນັກທຸລະກິດ ແລະ ມວນຊົນພາຍໃນເທດສະບານແຂວງເຂົ້າຮ່ວມຢ່າງພ້ອມພຽງ.
ໃນການປະກວດຄັ້ງນີ້ມີຜູ້ເຂົ້າຮ່ວມທັງໝົດ 19 ຄົນທີ່ເປັນຕົວແທນໃຫ້ແກ່ໂຮງຮຽນ ແລະ ບ້ານອ້ອມຂ້າງເທດສະບານແຂວງ. ຜົນການປະກວດຊະນະເລີດໄດ້ແກ່ ນາງ ຄຳພັດ ເພັດມີໄຊ ມາຈາກບ້ານນາໜອງບົວໄດ້ຮັບ ມົງກຸດ 1 ອັນ, ສາຍສະຟາຍ 1 ເສັ້ນ ພ້ອມເງິນສົດ 3 ລ້ານກີບ, ຮອງອັນດັບ 1 ແມ່ນ ນາງ ມີນາ ພົມມະຈັນ ມາຈາກບ້ານໂພໄຊ ໄດ້ຮັບສາຍສະຟາຍ 1 ເສັ້ນພ້ອມເງິນສົດ 2 ລ້ານກີບ, ຮອງອັນດັບ 2 ແມ່ນ ນາງ ສຸດາລັດ ອຸ່ນມະນີ ມາຈາກໂຮງຮຽນ ມໍ ປາຍ ຕົວແບບໄດ້ຮັບສາຍສະຟາຍ 1 ເສັ້ນພ້ອມເງິນສົດ 1 ລ້ານກີບ ແລະ ໄດ້ຮັບລາງວັນຊົມເຊີຍຈຳນວນ 4 ຄົນໄດ້ຮັບເງິນສົດຜູ້ລະ 5 ແສນກີບ.
ທັງນີ້ເພື່ອເປັນການອະນຸລັກ ຮັກສາ ຮີດຄອງປະເພນີອັນດີງາມຂອງຊາດລາວທີ່ມີມາແຕ່ບູຮານນະການ ແລະ ເພື່ອເປັນການຄັດເລືອກເອົານາງສາວທັງ 7 ເປັນຕົວແທນຂອງລູກສາວ ພະຍາກະບິນລະພົມ ເຊິ່ງເປັນທີ່ມາຂອງກຸດສົງການບຸນປີໃໝ່ລາວ.

ຂ່າວຈາກ: ປະເທດລາວ