ເພື່ອເຮັດໃຫ້ງານສະເຫຼີມສະຫຼອງບຸນປີໃໝ່ລາວປະຈຳປີ ພສ 2559 ເຕັມ ໄປດ້ວຍບັນຍາກາດເບີກບານມ່ວນຊື່ນຮັກສາໄດ້ມູນເຊື້ອວັດທະນະທຳປະເພນີອັນດີງາມຂອງຊາດເປັນທີ່ດຶງດູດນັກທ່ອງທ່ຽວທັງພາຍໃນ ແລະຕ່າງປະເທດເຂົ້າ ສປປ ລາວ ກໍຄືນະຄອນຫຼວງວຽງຈັນ ທາງບໍລິສັດ ໄຊເສດຖາ ອໍກະໄນເຊີ ຈິ່ງຈັດງານປະຕິມະກຳຊາຍຢູ່ຫາດດອນຈັນຂຶ້ນອີກ ປະຈຸບັນການຄວັດແກະສະລັກຮູບປັ້ນຕ່າງໆໃກ້ຈະສຳເລັດ 100% ແລະຄາດວ່າໄວໆນີ້ຈະໃຫ້ມວນຊົນເຂົ້າຊົມກັນ.
ວັນທີ 7 ເມສາຜ່ານມາ ທ່ານ ນາງ ລັດສະດາພອນ ບຸດສະດີ ຜູ້ບໍລິຫານງານບໍລິສັດໄຊເສດຖາອໍກະໄນເຊີ ໃຫ້ສຳພາດກັບທີມຂ່າວພວກເຮົາວ່າ: ງານປະຕິມະກຳຊາຍຄັ້ງທີ 2 ນີ້ ເລີ່ມລົງມືກໍ່ສ້າງມາຕັ້ງ ແຕ່ວັນທີ 8 ມິນາຈົນຮອດປະຈຸບັນນີ້ການແກະສະລັກຮູບປັ້ນຕ່າງໆແມ່ນໃກ້ຈະສຳເລັດແລ້ວ ຄາດວ່າຈະເປີດໃຫ້ມວນຊົນເຂົ້າຊົມກັນທ້າຍອາທິດນີ້ເປັນຕົ້ນໄປສ່ວນມື້ເປີດງານຢ່າງເປັນທາງການແມ່ນໃນລະຫວ່າງວັນທີ 13-16 ເມສາ 2015 ໃນໂອກາດສົ່ງທ້າຍປີເກົ່າ ພສ 2558 ແລະຕ້ອນຮັບປີໃໝ່ ພສ 2559 ທີ່ຈະມາເຖິງ ເພື່ອເຮັດໃຫ້ບຸນປີໃໝ່ລາວ ເຕັມໄປດ້ວຍບັນຍາກາດຄວາມເບີກບານມ່ວນຊື່ນຮັກສາໄດ້ມູນເຊື້ອວັດທະນະ ທຳປະເພນີອັນດີງາມຂອງຊາດແນໃສ່ດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດເຂົ້າມາທ່ຽວຊົມນະຄອນຫຼວງວຽງຈັນ (ນວ) ຫຼາຍຂຶ້ນກວ່າປີຜ່ານມາ.
ງານປະຕິມະກຳຊາຍແມ່ນນຳເອົາ 15 ສັນຍາລັກມາຄວັດແກະສະຫຼັກເຮັດເປັນຮູບປັ້ນບົ່ງບອກໃຫ້ຮູ້ເຖິງຄວາມໝາຍຂອງ 10 ປະເທດອາຊຽນ ໃນນັ້ນ ມີຮູບໂຕຊ້າງ, ຮູບພະທາດຫຼວງ, ຮູບໂຕ ນາກ ມີຄວາມຍາວເຖິງ 9 ແມັດ ແລະຮູບອື່ນໆ ທີ່ບົ່ງບອກເຖິງຄວາມອຸດົມສົມບູນ ວັດທະນະທຳຂອງຊາດລາວ ແລະປະເທດອື່ນໆ.
ງານປະຕິມະກຳຊາຍຄັ້ງນີ້ມີນັກວິຈິດສິນ, ນັກສິລະປິນຄວັດແກະສະຫຼັກຊຽວຊານຈາກປະເທດອາເມຣິກາ, ໄທ ແລະລາວຮ່ວມກັນປະດິດສ້າງພາບຕ່າງໆຂຶ້ນ ເພື່ອໃຫ້ທຸກຄົນໄດ້ເບິ່ງໄດ້ຊົມປະຈຸບັນສ້າງໄດ້ 95% ຄາດວ່າວັນທີ 10 ເມສານີ້ຈະໃຫ້ສຳເລັດສົມບູນ 100% ຈະເລີ່ມເປີດໃຫ້ມວນຊົນໄດ້ເຂົ້າຊົມງານນັບແຕ່ເວລາ 9:00-21:00 ໂມງ ປີ້ເຂົ້າຊົມແມ່ນລາຄາ 10 ພັນກີບຕໍ່ຄົນ ຊຶ່ງສາມາດເຂົ້າຊົມງານໄດ້ທຸກສະຖານທີ່ໂດຍບໍ່ຈຳ ກັດ ສຳລັບເດັກນ້ອຍອາຍຸ 5 ປີລົງມາແມ່ນບໍ່ໄດ້ເສຍຄ່າຜ່ານປະຕູ.
ທີ່ມາ: