ກຸ່ມສິດທິຮິວແມນໄຣສວອຊມີລາຍງານມື້ນີ້ວ່າ ປະຈຸບັນຍັງມີປະຊາກອນ 20 ລ້ານຄົນໃນບັງກະລາເທດຕ້ອງດື່ມນໍ້າປົນເປື້ອນສານໜູ ພາຍຫຼັງຈາກພົບວ່າມີສານພິດດັ່ງກ່າວປົນເປື້ອນຢູ່ໃນແຫລ່ງນໍ້າຕັ້ງແຕ່ເມື່ອ 20 ປີກ່ອນ.
ລາຍງານຮິວເມນໄຣສວອຊລະບຸວ່າ ທາງການບັງກະລາເທດຍັງບໍ່ສາມາດແກ້ໄຂບັນຫາດັ່ງກ່າວໄດ້ ຊຶ່ງມີສ່ວນເຮັດໃຫ້ປະຊາຊົນເສຍຊີວິດປະມານ 43.000 ຄົນໃນແຕ່ລະປີ ສ່ວນໃຫຍ່ຢູ່ໃນພື້ນທີ່ຊົນນະບົດ; ກໍລະນີແຫລ່ງນໍ້າປົນເປື້ອນສານພິດມີມາຕັ້ງແຕ່ໃນຍຸກຫຼັງປີ 1970 ໄລຍະທີ່ລັດຖະບານບັງກະລາເທດຊຸດເຈາະແຫລ່ງນໍ້າຫຼາຍລ້ານແຫ່ງເພື່ອຈັດຫານໍ້າສະອາດສຳລັບປະຊາຊົນທ້ອງຖິ່ນ ໂດຍບໍ່ໄດ້ຄິດວ່າເປັນແຫລ່ງທີ່ມີສານໝູປົນເປື້ອນໃນປະລິມານຫຼາຍ, ນັກວິໄຈກຸ່ມສິດທິກ່າວວ່າ ທາງການບັງກະລາເທດຍັງບໍ່ສາມາດດຳເນີນການໃນຂັ້ນພື້ນຖານທີ່ຈະກຳຈັດສານໜູຈາກແຫລ່ງນໍ້າບໍລິໂພກສຳລັບປະຊາຊົນຫຼາຍລ້ານຄົນໃນພື້ນທີ່ຊົນນະບົດເນື່ອງຈາກລະບົບບໍລິຫານຈັດການບໍ່ດີ ແລະສະຖານະການໃນປະຈຸບັນຮ້າຍແຮງເທົ່າໆກັບເມື່ອ 15 ປີກ່ອນ, ອົງການອະນາໄມໂລກລະບຸວ່າ ວິກິດສານໜູໃນບັງກະລາເທດນັບເປັນເຫດປະຊາກອນໄດ້ຮັບສານພິດຄັ້ງໃຫຍ່ທີ່ສຸດປະຫວັດສາດ ທັງນີ້ ການໄດ້ຮັບສານໜູຕໍ່ເນື່ອງມີສ່ວນເຮັດໃຫ້ເກີດມະເຮັງຢູ່ຕັບ ໄຕ ພົກຍ່ຽວ ແລະຢູ່ຜິວໜັງ ລວມເຖິງພະຍາດທີ່ກ່ຽວກັບຫົວໃຈ.