ແຂວງສາລະວັນແນະນໍາ 4 ສະຖານທີ່ທ່ອງທ່ຽວຍອດນິຍົມທາງທໍາມະຊາດເພື່ອຕ້ອນຮັບນັກທ່ອງທ່ຽວພາຍໃນ ແລະ ຕ່າງປະເທດໃນໄລຍະປີໃໝ່ລາວ ພສ 2559 ທີ່ຈະມາເຖິງນີ້ ຂະນະມາດຕະການຮັກຄວາມປອດໄພ ແລະ ຄ່າບໍລິການສິ່ງອໍານວຍຄວາມສະດວກຕ່າງໆເປັນບັນຫາໃຈກາງຕອ້ງຄວບຄຸມ ແລະ ກໍານົດຢ່າງເຂັ້ມງວດ.
ທ່ານ ທີບພະວົງ ສຸວັນນະແພງສີ ຫົວໜ້າຂະແໜງຖະແຫລງຂ່າວ ວັດທະນະທຳ ແລະ ທ່ອງທຽ່ວໄດ້ລາຍງານຫວ່າງບໍ່ດົນມານີ້ວ່າ: ຂະແໜງ ຖວທຂອງພວກເຮົາໄດ້ສົມທົບກັບຜູ້ປະກອບການທຸລະກິດແຫລ່ງທ່ອງທຽ່ວ ແລະ ອຳນາດການປົກຄອງບ້ານເພື່ອຫ້າງຫາກະກຽມສະຖານທີ່ບ່ອນຫລິ້ນ, ຮ້ານອາຫານ, ເຮືອພັກ, ໂຮງແຮມ ແລະ ສິ່ງອໍານວຍຄວາມສະດວກຕ່າງໆ ປັດຈຸບັນນີ້ ພາຍໃນແຂວງສາລະວັນຂອງພວກເຮົາໄດ້ມີແຫລ່ງທ່ອງທ່ຽວຫລາຍບ່ອນ ແຕ່ບ່ອນທີ່ພວກເຮົາເນັ້ນໜັກທີ່ສຸດແມ່ນ 4 ສະຖານທີ່ຍອດນິຍົມຄື: ນ້ຳຕົກຕາດສູງ, ນ້ຳຕົກຕາດເລາະ, ນ້ຳຕົກຕາດຮັງ ແລະ ນ້ຳຕົກຕາດຖ້ຳຜາ.
ສະເພາະປີນີ້ ພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວແຂວງຈະໄດ້ຈັດຫລາຍກິດຈະກໍາເພື່ອສົ່ງເສີມຮີດຄອງປະເພນີອັນດີງາມຂອງຊາດໃຫ້ຢູ່ຄູ່ກັບພວກເຮົາ ພ້ອມຍັງເປັນໂຄສະນາເຜີຍແຜ່ວິຖີຊີວິດຂອງປະຊາຊົນລາວບັນດາເຜົ່າໃຫ້ຊາວໂລກຮັບຮູ້ອີກດ້ວຍ ໃນນັ້ນຈະມີການບາສີສູ່ຂວັນ, ຫົດນໍ້າຜູ້ອາວຸໂສ, ການແຂ່ງຂັນຂີ່ເຮືອແພລ່ອງນ້ຳວັງຄຳເພື່ອໃຫ້ມີບັນ ຍາກາດ ເບີກບານມ່ວນຊື່ນຟົດຟື້ນ.
ສ່ວນຄ່າບໍລິການຕ່າງໆໄດ້ກໍານົດດັ່ງນີ້: ຄ່າເຮືອພັກ 50.000 ກີບ-70.000 ກີບຕໍ່ຄືນ, ຄ່າຝາກລົດຈັກ 10. 000 ກີບຕໍ່ຄັນ , ລົດໃຫ່ຍ 20.000 ກີບຕໍ່ຄັນ ເສຍ ແລະ ອື່ນໆ. ແຂວງສາລະວັນມີແຫລ່ງທ່ອງທ່ຽວທັງໝົດ89 ແຫ່ງ ໃນນັ້ນແຫລ່ງທຳມະຊາດ 48 ແຫ່ງ, ແຫລ່ງວັດທະນະທໍາ 34 ແຫ່ງ ແລະ ແຫລ່ງປະຫວັດສາດມີ 7 ສ່ວນໂຮງ ແຮມມີ 6 ແຫ່ງ, ເຮືອນພັກ 40 ແຫ່ງ ແລະ ຮ້ານອາຫານ 43 ແຫ່ງ.
ຂ່າວຈາກ: ຂ່າວປະເທດລາວ