ຂປລ. ໃນປັດຈຸບັນ ພາກສ່ວນທີ່ຮັບຜິດຊອບຈັດກິດຈະກຳງານປະຕິມາກຳຊາຍ ທີ່ຫາດດອນຈັນ ເມືອງຈັນທະບູລີ ນະຄອນຫລວງວຽງຈັນ, ພວມຂຸ້ນຂຽວສ້າງຮູບປັ້ນຊາຍ ຈຳນວນ 13 ຮູບ ທີ່ສະແດງໃຫ້ເຫັນເຖິງວັດທະນະທຳ ແລະ ມູນມໍລະດົກຂອງລາວ ລວມເຖິງຂອງບັນດາປະເທດສະມາຊິກອາຊຽນ ເຊິ່ງມີຄວາມຄືບໜ້າປະມານ 90% ແລ້ວ ໃນມູນຄ່າການລົງທຶນຫລາຍກວ່າ 700 ລ້ານກີບ, ຄາດວ່າຈະສຳເລັດ ແລະ ເປີດໃຫ້ມວນຊົນຊາວນະຄອນຫລວງວຽງຈັນ ກໍຄືບັນດານັກທ່ອງທ່ຽວທັງພາຍໃນ ແລະ ຕ່າງປະເທດ ໄດ້ຊົມໃນວັນທີ 13 ເມສາ ນີ້ ເຊິ່ງເປັນມື້ທຳອິດຂອງບຸນປີໃໝ່ລາວ.
ທ່ານ ນາງ ລັດສະດາພອນ ບຸດສະດີ ຜູ້ອຳນວຍການຝ່າຍກິດຈະກຳຂອງບໍລິສັດ Proplus Agency ເຊິ່ງເປັນບໍລິສັດທີ່ຮັບເໝົາກິດຈະກຳດັ່ງກ່າວ ໃຫ້ຮູ້ວ່າ: ງານປະຕິມາກຳຊາຍ ແມ່ນຈັດຂຶ້ນເປັນປີທີ 2 ແລ້ວ ແລະ ຮູບປັ້ນປະຕິມາກຳຊາຍທີ່ສ້າງຂຶ້ນໃນປີນີ້ ແມ່ນແຕກຕ່າງຈາກປີຜ່ານມາ ເພາະວ່າ ຮູບພາບທັງໝົດແມ່ນສະແດງໃຫ້ເຫັນມູນມໍລະດົກອັນລຳຄ່າທາງ ດ້ານວັດທະນະທໍາຂອງລາວ ແລະ ຂອງບັນດາປະເທດສະມາຊິກອາຊຽນ ເຊິ່ງໃນຈຳນວນ 13 ຮູບນັ້ນ ມີ 10 ຮູບທີ່ກ່ຽວກັບບັນດາປະເທດສະມາຊິກອາຊຽນ, ສວນອີກ 3 ຮູບ ແມ່ນກ່ຽວກັບ ສປປ ລາວ ຄື: ຮູບພະທາດຫລວງ ທີ່ມີຄວາມສູງ 6 ແມັດ, ຮູບຊ້າງ ສູງ 8 ແມັດ ແລະ ຮູບພະຍານາກ ສູງ 4 ແມັດ, ຍາວ 9 ແມັດ ໂດຍໄດ້ເລີ່ມລົງມືກໍ່ສ້າງມາແຕ່ ວັນທີ 8 ມີນາ, ຄາດວ່າຈະເປີດໃຫ້ຊົມໃນວັນທີ 13-16 ເມສາ 2016 ນີ້ ນັບແຕ່ເວລາ 9:00-21:00 ໂມງ ໂດຍຈະເກັບຄ່າເຂົ້າຊົມ 10.000 ກີບ/ຄົນ, ສຳລັບເດັກນ້ອຍອາຍຸຕ່ຳກວ່າ 5 ປີ ຈະບໍ່ໄດ້ເສຍຄ່າ.
ທ່ານນາງ ລັດສະດາພອນ ບຸດສະດີ ຍັງຍົກໃຫ້ເຫັນວ່າ: ນອກຈາກງານມະຕິມະກຳຊາຍແລ້ວ ທາງບໍລິສັດ ຍັງ ໄດ້ຮັບມອບໝາຍຈາກອຳນາດການປົກຄອງນະຄອນ ຫລວງວຽງຈັນ ຈັດກິດຈະກຳທາງດ້ານວັດທະນະທຳ ຢູ່ທີ່ຫາດດອນຈັນ ໃນເນື້ອທີ່ຄວາມກວ້າງ 200 ແມັດ ແລະ ຍາວ 650 ແມັດ, ໃນນັ້ນ ມີ ກິດຈະກຳຕົບພະທາດຊາຍ, ສິລະປະການສະແດງ, ການເດີນແບບເຄື່ອງນຸ່ງຝ້າຍລາວ, ການແຂ່ງຂັນກິລາ ແລະ ຍັງມີສະຖານທີ່ຫລີ້ນນ້ຳ, ຊົມທຳມະຊາດຕາມລຳແມ່ນ້ຳຂອງຕື່ມອີກ.
ແຫລ່ງຂ່າວ: 