ໃນວັນທີ 31 ມີນາ 2016 ທີຜ່ານມາ ພະນັກງານວິຊາການຂະແໜງຊັບສິນທາງປັນຍາ ມາດຕະຖານ ແລະ ວັດແທກ ຮ່ວມກັບ ຄະນະຈັດສັນຕະຫຼາດ ໄດ້ລົງເຄື່ອນໄຫວກວດສອບມາດຕະຖານຂອງຊິງຊັ່ງ ພ້ອມທັງຂຶ້ນທະບຽນຊິງຊັ່ງທົ່ວໄປ ແລະ ຊິງຊັ່ງຄໍາ ໂດຍການນຳພາຂອງ ທ່ານ ແສງຄຳ ພິມມະສອນ ຫົວໜ້າຂະແໜງຊັບສິນທາງປັນຍາ ມາດຕະຖານ ແລະ ວັດແທກ ໃຫ້ແມ່ຄ້າຊາວຂາຍຕາມທ້ອງຕະຫຼາດໃຫ້ຖືກຕ້ອງຕາມລະບຽບການ ເພື່ອບໍ່ເປັນການເອົາປຽບຜູ້ອຸປະໂພກ-ບໍລິໂພກ ໃນຈໍານວນ 3 ຕະຫຼາດ ອ້ອມຂ້າງເທສະບານເມືອງທ່າແຂກ ຄື ຕະຫຼາດສຸກສົມບູນ ຕະຫຼາດຫຼັກ 2 ແລະ ຕະຫຼາດເພັດມະນີ.
ການລົງເຄື່ອນໄຫວໃນຄັ້ງນີ້ ບັນດາຈັດສັນຕະຫຼາດ ແລະ ຊາວຄ້າຂາຍສ່ວນຫຼາຍແມ່ນໄດ້ໃຫ້ການຮ່ວມມື ແລະ ເຂົ້າໃຈເຖິງວຽກງານນີ້ຫຼາຍຂຶ້ນ ຖ້າທຽບໃສ່ປີຜ່ານມາ ຍັງມີແມ່ຄ້າຈຳນວນໜ້ອຍທີ່ຍັງບໍ່ໃຫ້ຄວາມຮ່ວມມື ຜ່ານການລົງກວດກາໂຕຈິງ ສາມາດກວດຊິງຊັ່ງທົ່ວໄປໄດ້ຈຳນວນ 337 ໜ່ວຍ ແລະ ໄດ້ກວດພົບຊິງທີ່ບໍ່ໄດ້ມາດຕະຖານຈຳນວນ 12 ໜ່ວຍ ແລະ ກວດຊິງຊັ່ງຄຳຕາມຮ້ານຄຳຈຳນວນ 42 ໜ່ວຍໃນ 3 ຕະຫຼາດ.
ຂ່າວ/ພາບ: ຄູນປະເສີດ ໃບຫຼວງລາດ
ຂ່າວຈາກ: ວິທະຍຸ-ໂທລະພາບນະຄອນຫຼວງ