ເພື່ອເຮັດໃຫ້ການຊົມໃຊ້ນ້ຳໃນໄລຍະສະຫຼອງບຸນປີໃໝ່ລາວທີ່ຈະມາຮອດໃນອາທິດໜ້ານີ້ມີຄວາມຄຶກຄື້ນມ່ວນຊື່ນ ແລະພຽງພໍກັບຄວາມຕ້ອງການຊົມໃຊ້ຂອງພໍ່ແມ່ປະຊາຊົນ ວັນທີ 5 ເມສາ 2016 ຢູ່ລັດວິສາຫະກິດນ້ຳປະປານະຄອນຫຼວງວຽງຈັນໄດ້ຈັດພິທີຖະແຫຼງຂ່າວໂດຍຮຽກຮ້ອງໃຫ້ຜູ້ຊົມໃຊ້ມີຄວາມປະຢັດ ແລະໃຫ້ເກີດປະໂຫຍດເທົ່າທີ່ຈະຫຼາຍໄດ້, ພ້ອມທັງຫຼີກເວັ້ນການໃຊ້ນ້ຳແບບຟຸມເຟືອຍ.
ທ່ານ ຄຳເຜີຍ ວົງສາຄຳຜຸຍ ຜູ້ອຳນວຍການໃຫຍ່ລັດວິສາຫະກິດນ້ຳປະປານະຄອນຫຼວງວຽງຈັນຖະແຫຼງວ່າ: ປະຈຸບັນ ການຜະລິດ ແລະສະໜອງນ້ຳປະປາໃຫ້ແກ່ຜູ້ຊົມໃຊ້ແມ່ນຍັງບໍ່ທັນທົ່ວເຖິງ ແລະພຽງພໍກັບຄວາມຕ້ອງການເນື່ອງຈາກວ່າຄວາມສາມາດຂອງລັດວິສາຫະກິດນ້ຳປະປາ ນະຄອນຫຼວງວຽງຈັນທີ່ສາມາດຜະລິດ ແລະສະໜອງນ້ຳໄດ້ຮອດດຽວນີ້ມີພຽງ 2,8 ແສນ ແມັດກ້ອນຕໍ່ມື້ໃນ 4 ໂຮງງານ ເຊັ່ນ: ໂຮງງານດົງໝາກຄາຍ, ດົງບັງ, ຈີ່ນາຍໂມ້ ແລະໂຮງງານນ້ຳປະປາເກົ້າລ້ຽວ, ແຕ່ຄວາມຕ້ອງການຕົວຈິງໃນການຊົມໃຊ້ນ້ຳປະປາໃນຂອບເຂດທົ່ວນະຄອນຫຼວງວຽງຈັນແມ່ນມີຄວາມຕ້ອງການ 3,20 ຫາ 3,40 ແສນແມັດກ້ອນຕໍ່ມື້, ດັ່ງນັ້ນ ຈິ່ງຮຽກຮ້ອງເຖິງພໍ່ແມ່ປະຊາຊົນ ກໍຄືຜູ້ທີ່ຊົມໃຊ້ນ້ຳຢ່າງປະຢັດໂດຍສະເພາະແມ່ນການຫຼິ້ນບຸນປີໃໝ່ລາວ ພສ 2559 ນີ້, ທັງນີ້ ກໍເພື່ອເຮັດໃຫ້ນ້ຳມີແຮງດັນໄປຫາຜູ້ທີ່ອາໄສຢູ່ເຂດບໍລິເວນສູງໄດ້ຊົມໃຊ້ນ້ຳຢ່າງທົ່ວເຖິງ.
ຢ່າງໃດກໍຕາມ ບຸນປີໃໝ່ລາວ ພສ 2559 ແມ່ນຢູ່ໃນໄລຍະອາກາດຮ້ອນ ແລະ ເປັນບຸນທີ່ນຳໃຊ້ນ້ຳຫຼາຍກວ່າໝູ່,ສະນັ້ນທ່ານຜູ້ອຳນວຍການຈິ່ງຮຽກຮ້ອງເຖິງພໍ່ແມ່ປະຊາຊົນທົ່ວນະຄອນຫຼວງວຽງຈັນທີ່ຫຼິ້ນບຸນປີໃໝ່ຕາມຖະໜົນຫົນທາງ, ເຮືອນຊານບ້ານຊ່ອງໃຫ້ ຊົມໃຊ້ນ້ຳຢ່າງປະຢັດ, ຄວນໂຕ່ງໃສ່ຟຸຍ, ໃສ່ຄຸ, ໃສ່ຖັງ ແລະພາຊະນະໃສ່ນ້ຳແລ້ວຈິ່ງຕັກຫົດສົງກັນດີກວ່າເປີດກ໋ອກນ້ຳແລ້ວຕໍ່ທໍ່ໄປສີດໃສ່ກັນຊຶ່ງຈະສ້າງຄວາມ ສິ້ນເປືອງຊັບສິນສ່ວນຕົວກໍຄືຊັບສິນຂອງສ່ວນລວມເພາະວ່າການໃຊ້ນ້ຳປະປາໃນໄລຍະບຸນປີໃໝ່ແຕ່ລະປີປະລິມານການຊົມໃຊ້ນ້ຳເພີ່ມຂຶ້ນ 30% ຈາກຈຳນວນການຊົມໃຊ້ປົກກະຕິ, ຂະນະທີ່ບາງເຂດໃນນະຄອນຫຼວງວຽງຈັນຍັງບໍ່ທັນໄດ້ຊົມໃຊ້ນ້ຳປະປາເທື່ອ ແລະຄາດວ່າການຊົມໃຊ້ນ້ຳເພື່ອບຸນປີໃໝ່ໃນປີນີ້ກໍຈະມີປະລິມານເພີ່ມຂຶ້ນເຊັ່ນດຽວກັນກັບປີຜ່ານໆມາ.
ທີ່ມາ: 