ຮອງຫົວໜ້າພະແນກມອດໄຟ ນະຄອນຫລວງວຽງຈັນ ໃຫ້ຮູ້ວ່າ:ປັດຈຸບັນ ບັນຫາອັກຄີໄພໄດ້ເກີດຂຶ້ນຢ່າງຕໍ່ເນື່ອງ ແລະ ຍັງມີຄວາມສ່ຽງທີ່ອາດຈະເກີດຂຶ້ນໄດ້ທຸກເວລາ, ຊຶ່ງມາຮອດປັດຈຸບັນ ກໍກ້າວເຂົ້າສູ່ເດືອນທີສີ່ຂອງປີ2016 ແລ້ວ ແລະ ໃນ 3 ເດືອນຜ່ານມານີ້, ຢູ່ນະຄອນຫລວງວຽງຈັນ ໄດ້ເກີດອັກຄີໄພຂຶ້ນ 21 ຄັ້ງ ສົ່ງຜົນເສຍຫາຍຫລາຍກວ່າ 7 ຮ້ອຍລ້ານກີບ, ເມື່ອທຽບໃສ່ໄລຍະດຽວກັນຂອງປີຜ່ານມາ ເຫັນວ່າເພີ່ມຂຶ້ນເກືອບເທົ່າຕົວ, ໃນນັ້ນ ສະເພາະເດືອນມັງກອນຜ່ານມາ, ໄດ້ເກີດເຫດການໄຟໄໝ້ລະດັບກາງ ແລະ ນ້ອຍຈຳນວນ 7 ຄັ້ງ, ຊຶ່ງເກີດຈາກໄຟຟ້າຊ໋ອດ, ໄຕ້ທຽນບູຊາ, ຈູດປ່າຊະຊາຍ ລວມມູນຄ່າເສຍຫາຍຫລາຍກວ່າ 3 ຮ້ອຍລ້ານກີບ, ຕົກມາຮອດເດືອນກຸມພາ, ໄດ້ເກີດໄຟໄໝ້ທັງໝົດ 8 ຄັ້ງ, ອັນເນື່ອງມາຈາກການຫລາຍສາເຫດເປັນຕົ້ນ ການຈູດປ່າຊະຊາຍຂອງປະຊາຊົນ ຈຶ່ງເຮັດໃຫ້ໄຟໄດ້ລາມ
ໃສ່ໂຮງງານທີ່ຢູ່ໄກ້ຄຽງ ລວມມູນຄ່າເສຍຫາຍຫລາຍກວ່າ 2 ຮ້ອຍລ້ານກີບ ແລະ ໃນເດືອນມີນາທີ່ຜ່ານມານີ້, ໄດ້ເກີດເຫດໄຟໄໝ້ຂຶ້ນລວມ 6 ຄັ້ງ, ສ່ວນໃຫຍ່ແມ່ນໄຟໄໝ້ລະດັບນ້ອຍ ໃນນັ້ນສາເຫດແມ່ນເກີດຈາກໄຟຟ້າລັດວົງຈອນ ເນື່ອງຈາກການຊົມໃຊ້ໄຟຟ້າຫລາຍຂອງປະຊາຊົນ.
ຮອງຫົວໜ້າພະແນກມອດໄຟ ກ່າວຕື່ມວ່າ: ຕໍ່ກັບສະພາບດັ່ງກ່າວນີ້, ກົມມອດໄຟ ຮ່ວມກັບ ພະແນກມອດໄຟນະຄອນຫລວງວຽງຈັນ ໄດ້ເພີ່ມສະຖານນີມອດໄຟຂຶ້ນຕື່ມອີກ 4 ແຫ່ງຄື: ເມືອງປາກງື່ມ, ຫາດຊາຍຟອງ, ສັງທອງ ແລະ ເມືອງໄຊທານີ ແລະ ມອບລົດນ້ຳໃຫ້ເມືອງລະ 2 ຄັນ ພ້ອມວິຊາການທີ່ມີຄວາມຮູ້ຈຳນວນໜຶ່ງ ເພື່ອເພີ່ມທະວີຄວາມຮັບຜິດຊອບໃນການຈັດຕັ້ງປະຕິບັດມາດຕະ ການປ້ອງກັນ ແລະ ສະກັດກັ້ນອັກຄີໄພ ຢູ່ໃນເຂດຊຸມຊົນຫ່າງໄກສອກຫລີກ ບໍ່ໃຫ້ລຸກລາມໄປໃນວົງກວ້າງ . ນອກນີ້ ທ່ານຮອງຫົວໜ້າພະແນກ ຍັງໄດ້ຮຽກຮ້ອງໃຫ້ທຸກພາກສ່ວນໃນສັງຄົມ ຈົ່ງພ້ອມກັນມີສະຕິ, ລະມັດລະວັງຫລາຍຂຶ້ນກວ່າເກົ່າ, ກ່ອນອອກຈາກຫ້າງຮ້ານ, ບ້ານເຮືອນ, ຫ້ອງການ ແລະ ອົງການໃຫ້ກວດກາຖອດປັກສຽບເຄື່ອງໄຟຟ້າຕ່າງໆ ແລະ ໃນໄລຍະບຸນປີໃໝ່ລາວທີ່ຈະມາເຖິງນີ້ ໃຫ້ສະເຫລີມສະຫລອງຢ່າງສະຕິ, ບໍ່ຄວນລະເລີ້ງ ແລະ ໃຊ້ໄຟຟ້າຈົນເກີນຂອບເຂດ ພ້ອມທັງໃຫ້ກວດກາສາຍໄຟຟ້າທີ່ເຫັນວ່າເກົ່າແກ່, ຊຸດໂສມຫລາຍແລ້ວ ແມ່ນໃຫ້ປ່ຽນຖ່າຍທັນທີ ເພື່ອປ້ອງກັນການເກີດອັກຄີໄພທີ່ຈະຕາມມາ.
ຂ່າວຈາກ: 