ນັບວ່າເປັນເລື່ອງປົກກະຕິ ສຳລັບການສວຍໂອກາດຂຶ້ນລາຄາສິນຄ້າຂອງຊາວຄ້າຂາຍ ໃນໄລຍະເທສະການຕ່າງໆ, ໂດຍສະເພາະສິນຄ້າປະເພດອາຫານເປັນຕົ້ນ: ຊີ້ນ, ປາ, ພືດຜັກ ແລະ ເຄື່ອງສັກກະລັກບູຊາຕ່າງໆ, ຍ້ອນໃນຊ່ວງດັ່ງກ່າວ ແມ່ນມີຜູ້ຊົມໃຊ້ ແລະ ບໍລິໂພກເພີ່ມຂຶ້ນຫລາຍ, ຈຶ່ງເປັນຊ່ອງຫວ່າງເຮັດໃຫ້ຊາວຄ້າຂາຍສວຍໂອກາດຂຶ້ນລາຄາສິນຄ້າ, ຊຶ່ງບັນຫານີ້ຍັງເຫັນວ່າສັງຄົມຍັງມີຄວາມເປັນຫວ່ງບໍ່ໜ້ອຍ, ຂະນະທີ່ມາຮອດປັດຈຸບັນ ພາກສ່ວນກ່ຽວຂ້ອງຍັງບໍ່ທັນມີແຈ້ງການ ຫລື ມາດຕະການອັນໃດອອກມາເພື່ອຄຸ້ມຄອງລາຄາສິນຄ້າໃນຊ່ວງໄລຍະບຸນປີໃໝ່ນີ້ ເຖິງວ່າກ່ອນໜ້ານີ້ ຫ້ອງວ່າການລັດຖະບານ ຈະມອບໃຫ້ກະຊວງອຸດສາຫະກຳແລະ ການຄ້າ ເອົາໃຈໃສ່ຊີ້ນຳ, ຕິດຕາມ, ຄຸ້ມຄອງລາຄາສິນຄ້າໃນ
ທ້ອງຕະຫລາດ ບໍ່ໃຫ້ພໍ່ຄ້າຊາວຂາຍ, ຜູ້ປະກອບການ ສວຍໂອກາດຂຶ້ນລາ ຄາສິນຄ້າໂດຍບໍ່ມີເຫດຜົນ ແລະ ໃຫ້ກະຊວງກະສິກຳ ແລະ ປ່າໄມ້ ສົມທົບກັບກະຊວງກ່ຽວຂ້ອງເອົາໃຈໃສ່ຊຸກຍູ້ສົ່ງເສີມການຜະລິດ, ຕິດພັນກັບການສະໜອງສິນຄ້າໃຫ້ພຽງພໍກັບຄວາມຕ້ອງການຂອງສັງຄົມ. ແຕ່ປະກົດວ່າຍັງມິດງຽບຢູ່, ຊຶ່ງອາດຈະເປັນຊ່ອງຫວ່າງໃຫ້ແກ່ຊາວຄ້າຂາຍສວຍໂອກາດເອົາປຽບຜູ້ບໍລິໂພກໄດ້ງ່າຍ. ດັ່ງນັ້ນ ພາກສ່ວນກ່ຽວຂ້ອງຄວນແຕ່ງຕັ້ງໜ່ວຍງານຂອງຕົນລົງກວດ ກາ, ຕິດຕາມລາຄາສິນຄ້າຢ່າງເປັນປົກກະຕິໃນຊ່ວງນີ້ ເພື່ອປົກປ້ອງຜົນປະໂຫຍດອັນຊອບທຳຂອງສັງຄົມ.
ຂ່າວຈາກ:
