ສຳນັກຂ່າວຕ່າງປະເທດ ລາຍງານໃນວັນທີ 5 ເມສານີ້ວ່າ ກະຊວງການຕ່າງປະເທດ ສະຫະລັດອາເມຣິກາ ໄດ້ອອກຖະແຫລງການ ຮຽກຮ້ອງມາຍັງລັດຖະບານໄທ ໃນວັນຈັນທີ 4 ເມສາຜ່ານມານີ້ ໃຫ້ຈຳກັດບົດບາດຂອງກອງທັບ ຫລັງຈາກທີ່ຄະນະລັດຖະປະຫານ ໄດ້ເພີ່ມອຳນາດໃຫ້ທະຫານ ມີສິດຄ້າຍຄືກັບຕຳຫລວດ ສາມາດຈັບກຸມ ແລະ ຄວບຄຸມຕົວຜູ້ຖືກສົງໄສ ຕະຫລອດຮອດຍຶດຊັບສິນ, ກວດຄົ້ນເຄຫະສະຖານ ແລະ ສອບສວນພົນລະເຮືອນ.

ທ່ານ ແຄດຕິນາ ອະດຳ ໂຄສົກກະຊວງການຕ່າງປະເທດ ສະຫະລັດອາເມຣິກາ ດ້ານອາຊີຕາເວັນອອກ ໄດ້ລະບຸວ່າ ສະຫະລັດຯ ຊຶ່ງເປັນພັນທະມິດຍາວນານຂອງໄທ ຂໍຮຽກຮ້ອງມາຍັງລັດຖະບານໄທ ໃຫ້ເຈົ້າໜ້າທີ່ພົນລະເຮືອນ ໄດ້ປະຕິບັດໜ້າທີ່ຂອງຕົນເອງ ແລະ ນຳຂະບວນການພິຈາລະນາຄະດີ ກັບຄືນສູ່ສານຂອງຝ່າຍພົນລະເຮືອນ.