ສຳນັກຂ່າວຕ່າງປະເທດ ລາຍງານວ່າ ໃນຕອນຫົວຄ່ຳຂອງວັນທີ 4 ເມສາຜ່ານມານີ້ ເກີດເຫດເຮືອບິນ 2 ລຳ ຕຳກັນຢູ່ເທິງທາງແລ່ນເຮືອບິນ ຂອງສະໜາມບິນຮາລິມເປີດານາກຸສຸມາ ນະຄອນຫລວງຈາກາຕາ ປະເທດອິນໂດເນເຊຍ ໂດຍເຮືອບິນໂບອິ້ງ 737-800 ຂອງສາຍການບິນບາຕິກແອຣ໌ ໃນຂະນະທີ່ກຳລັງຈະຂຶ້ນບິນ ອອກຈາກສະໜາມບິນດັ່ງກ່າວ ແຕ່ປີກຂອງເຮືອບິນລຳນີ້ ໄດ້ໄປເກາະເຂົ້າກັບຫາງ ຂອງເຮືອບິນຂະໜາດນ້ອຍລຳໜຶ່ງ ທີ່ກຳລັງຖືກລົດລາກອອກຈາກທາງແລ່ນ ຈົນເຮັດໃຫ້ເກີດໄຟລຸກໄໝ້ຂຶ້ນ.
ແນວໃດກໍຕາມ ກະຊວງຄົມມະນາຄົມອິນໂດເນເຊຍ ໄດ້ຖະແຫລງວ່າ ຜູ້ໂດຍສານທຸກຄົນ ແລະ ລູກເຮືອ ໄດ້ຮັບການອົບພະຍົບ ລົງຈາກເຮືອບິນຢ່າງປອດໄພ ຊຶ່ງສະໜາມບິນແຫ່ງດັ່ງກ່າວນີ້ ຈະຖືກປິດໃຫ້ບໍລິການຊົ່ວຄາວ ຈົນກວ່າຈະມີການແຈ້ງໃຫ້ຮູ້ເພີ່ມເຕີມ.
https://www.youtube.com/watch?v=NDeOMRwq69M