ກອງປະຊຸມຄະນະປະຈຳສະພາແຫ່ງຊາດ ປະຈຳເດືອນມີນາ ໄດ້ຈັດຂຶ້ນແຕ່ລະຫວ່າງ ວັນທີ 4-5 ເມສານີ້ທີ່ ສະພາແຫ່ງຊາດ, ໂດຍການເປັນປະທານຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ເພື່ອຄົ້ນຄວ້າ, ພິຈາລະນາ ແລະ ຮັບຮອງເອົາຫລາຍບັນຫາສໍາຄັນຂອງຊາດຄື: ຜ່ານແຜນການຕາຕະລາງ ກອງປະຊຸມປະຖົມມະລຶກຂອງສະພາແຫ່ງຊາດຊຸດທີ VIII, ລາຍງານຮ່າງແຜນການສ້າງ ແລະ ປັບປຸງກົດໝາຍ 5 ປີ ຂອງສະພາແຫ່ງຊາດຊຸດທີ VIII, ລາຍງານການຂໍອະນຸມັດ ເປີດສືບສວນ-ສອບສວນ ແລະ ປະຕິບັດມາດຕະການທາງກົດໝາຍຕໍ່ ທ່ານ ຫຸມແພງ ສຸດທິວົງ ອະດິດສະມາຊິກສະພາແຫ່ງຊາດຊຸດທີ VII, ພິຈາລະນາຮັບຮອງເອົາ ສັດຕະຍາບັນວ່າດ້ວຍເອກະສິດ ແລະ ອະພິສິດຂອງປະຊາຄົມ ບັນດາປະຊາຊາດອາຊີຕາເວັນອອກສຽງໃຕ້, ລາຍງານຜົນຂອງການຄົ້ນຄວ້າ ໜັງສືສະເໜີຂອງລັດຖະບານ ເພື່ອໃຫ້ສະພາແຫ່ງຊາດ ຢັ້ງຢືນຮັບຊາບກ່ຽວກັບເອກະສານ ທີ່ໄດ້ຮັບຮອງເອົາຢູ່ກອງປະຊຸມໃຫຍ່ຂອງອົງການແຮງງານສາກົນ (ILO) ຄັ້ງທີ 104 ປະຈຳປີ 2015; ຜ່ານຮ່າງມະຕິຂອງ ຄະນະປະຈຳສະພາແຫ່ງຊາດ ວ່າດ້ວຍລະບຽບການດຳເນີນ ກອງປະຊຸມສະພາແຫ່ງຊາດ, ໂຄງຮ່າງມະຕິຂອງກອງປະຊຸມ ສະພາແຫ່ງຊາດວ່າດ້ວຍການຮັບຮອງເອົາດ້ານຫລັກການ ໃນການພັດທະນາໂຄງການເຂື່ອນໄຟຟ້ານ້ຳເທີນ 1 ເພື່ອເປັນພື້ນຖານໃຫ້ລັດຖະບານ ລົງນາມສັນຍາສຳປະທານໂຄງການດັ່ງກ່າວ, ພິຈາລະນາຮັບຮອງການລົງນາມສັນຍາເພີ່ມເຕີມສຳປະທານໂຄງການເຂື່ອນໄຟຟ້າໄຊຍະບູລີ (CA Addendum) ເພື່ອການລະດົມທຶນເພີ່ມເຕີມ, ພິຈາລະນາອອກມະຕິຕົກລົງຂອງ ສະພາແຫ່ງຊາດ ໃນການພັດທະນາໂຄງການເຂື່ອນໄຟຟ້ານ້ຳພາກ ແລະ ຂໍ້ສະເໜີຫັນປ່ຽນປ່າສະ ຫງວນແຫ່ງຊາດດົງຫົວສາວ ເພີ່ມຂຶ້ນຈາກເດີມ 29 ເຮັກຕາ ແລະ 9,345 ຕາແມັດມາເປັນ 34 ເຮັກຕາ ແລະ 4,691 ຕາແມັດ ແລະ ລາຍງານການກະກຽມເນື້ອໃນ ກ່ຽວກັບຂົງເຂດເສດຖະກິດ ຕໍ່ກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ VIII.
ແຫລ່ງຂ່າວ:
