ຂປລ. ໃນວັນທີ 3 ເມສາ 2016 ນີ້, ທີ່ຫ້ອງວ່າການ ລັດຖະບານ ທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ຕ້ອນຮັບການເຂົ້າຢ້ຽມຄຳນັບ ຂອງຄະນະຜູ້ແທນ ກອງປະຊຸມລັດຖະມົນຕີການເງິນອາຊຽນ ຄັ້ງທີ 20 ແລະ ກອງປະຊຸມຮ່ວມ ລະຫວ່າງ ລັດຖະມົນຕີການເງິນ ແລະ ຜູ້ວ່າການທະນາຄານກາງອາຊຽນ ຄັ້ງທີ 2 ທີ່ໄດ້ຈັດຂຶ້ນແຕ່ ວັນທີ 1-4 ເມສາ 2016 ນີ້.
ທ່ານ ນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ບັນດາລັດຖະມົນຕີ, ຜູ້ວ່າການທະນາຄານກາງອາຊຽນ ພ້ອມດ້ວຍຄະນະ ທີ່ໄດ້ເດີນທາງມາຮ່ວມກອງປະຊຸມ ລັດຖະມົນຕີການເງິນອາຊຽນ ຄັ້ງທີ 20 ແລະ ກອງປະຊຸມຮ່ວມ ລະຫວ່າງລັດຖະມົນຕີການເງິນ ແລະ ຜູ້ວ່າການທະນາຄານກາງອາຊຽນ ຄັ້ງທີ 2 ທີ່ ສປປ ລາວ ໃນຄັ້ງນີ້, ທ່ານນາຍົກລັດຖະມົນຕີ ໄດ້ສະແດງຄວາມຫວັງວ່າ ການປຶກສາຫາລືໃນກອງປະຊຸມຄັ້ງນີ້ ຈະເປັນການປະກອບສ່ວນສຳຄັນ ໃນການປະກອບສ່ວນ ພັດທະນາ ແລະ ເຊື່ອມໂຍງຂະແໜງການເງິນ-ເງິນຕາອາຊຽນ ເຊິ່ງຈະສະໜັບສະໜູນ ໃຫ້ແກ່ການຜະລິດ, ການຄ້າ ແລະ ການລົງທຶນ ໃນຕະຫລາດໜຶ່ງດຽວ ແລະ ສອດຄ່ອງກັບຄຳຂວັນທີ່ວ່າ: ຫັນວິໄສທັດປະຊາຄົມເສດຖະກິດອາຊຽນ ໄປສູ່ຄວາມເປັນຈິງ ເພື່ອຄວາມເຂັ້ມແຂງຂອງອາຊຽນ ແລະ ຍັງຈະເປັນການຍົກສູງບົດບາດຂອງ ສປປ ລາວ ໃຫ້ພົ້ນເດັ່ນຂຶ້ນ ໃນເວທີພາກພື້ນ ແລະ ສາກົນ.
ໃນໂອກາດດຽວກັນນີ້, ຄະນະຜູ້ແທນກອງປະຊຸມ ລັດຖະມົນຕີການເງິນອາຊຽນ ຄັ້ງທີ 20 ແລະ ກອງປະຊຸມຮ່ວມ ລະຫວ່າງ ລັດຖະມົນຕີການເງິນ ແລະ ຜູ້ວ່າການ ທະນາຄານກາງອາຊຽນ ຄັ້ງທີ 2 ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງ ທ່ານນາຍົກລັດຖະມົນຕີ, ພ້ອມທັງ ໄດ້ແຈ້ງໃຫ້ຊາບເຖິງ ຈຸດປະສົງຂອງການເດີນທາງ ມາເຂົ້າຮ່ວມກອງປະຊຸມທີ່ ສປປ ລາວ ໃນຄັ້ງນີ້ ເພື່ອປຶກສາຫາລື ແລະ ຮັບຮອງເອົາ ຫລາຍບັນຫາສຳຄັນກ່ຽວກັບ ວຽກງານຮ່ວມມືດ້ານການເງິນອາຊຽນ ເຊິ່ງລວມມີ ກອງທຶນພັດທະນາ ພື້ນຖານໂຄງລ່າງອາຊຽນ, ການຮ່ວມມືດ້ານປະກັນໄພ, ວຽກງານພາສີ, ອາກອນ, ການຕ້ານການຟອກເງິນ ແລະ ຕ້ານການສະໜອງແຫລ່ງທຶນ ໃຫ້ແກ່ພວກກໍ່ການຮ້າຍ.
ແຫລ່ງຂ່າວ:
