ກະຊວງປ້ອງກັນຄວາມສະຫງົບ ໄດ້ຈັດຂະບວນຍ່າງເພື່ອສຸຂະພາບ ສະເຫຼີມສະຫຼອງວັນສ້າງຕັ້ງກຳລັງປ້ອງກັນ ຄວາມສະຫງົບ ຄົບຮອບ 55 ປີ ຂຶ້ນເມື່ອຕອນເຊົ້າຂອງວັນທີ 2 ເມສານີ້ ທີ່ປະຕູໄຊ ພາຍໃຕ້ການເປັນປະທານ ກ່າວເປີດຂະບວນຍ່າງຢ່າງເປັນທາງການຂອງ ທ່ານ ພົນຕີ ສົມແກ້ວ ສີລາວົງ ຄະນະເລຂາທິການສູນກາງພັກ ກຳມະການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ ເປັນກຽດເຂົ້າຮ່ວມມີທ່ານ ດຣ. ບຸນທອງ ຈິດມະນີ ກຳມະການກົມການເມືອງສູນກາງພັກ ປະທານກວດກາພັກ-ລັດ ພ້ອມດ້ວຍຜູ້ນຳພັກ-ລັດ ຕະຫຼອດ ຮອດພະນັກງານ, ທະຫານ, ຕຳຫຼວດ ແລະ ມວນຊົນເຂົ້າຮ່ວມຢ່າງຫຼວງຫຼາຍ.
ທ່າມກາງບັນຍາກາດທົ່ວພັກ-ລັດ ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ພວມອອກແຮງແຂ່ງຂັນ ຈັດຕັ້ງປະຕິບັດຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ X ຂອງພັກ, ສະເຫຼີມສະຫຼອງຜົນສຳເລັດ ການເລືອກຕັ້ງສະມາຊິກສະພາແຫ່ງຊາດ ຊຸດທີ VIII ແລະ ສະມາຊິກສະພາປະຊາຊົນແຂວງ ແລະ ສະເຫຼີມສະຫຼອງວັນສຳຄັນຕ່າງໆຂອງຊາດ ໂດຍສະເພາະກໍຄືວັນສ້າງຕັ້ງ ກຳລັງປ້ອງກັນຄວາມສະຫງົບ ຄົບຮອບ 55 ປີ, ດັ່ງນັ້ນ ກະຊວງປ້ອງກັນຄວາມສະຫງົບ ຈຶ່ງໄດ້ຈັດພິທີຍ່າງເພື່ອສຸ ຂະພາບ ສະເຫຼີມສະຫຼອງວັນສຳຄັນດັ່ງກ່າວ ໃຫ້ເປັນຂະບວນ ແລະ ມີບັນຍາກາດຟົດຟື້ນ.
ແຫລ່ງຂ່າວ:
