ຂົວ​ເບ​ຕົງ 6 ແຫ່ງ​ລຽບ​ແຄມ​ຂອງ ແຂວງ​ສະ­ຫວັນ​ນະ​ເຂດ ຈະ​ແລ້ວ​ກ່ອນ​ຝົນ​ປີ​ນີ້

0
1894

ອາ­ທິດ​ຜ່ານ​ມາ ທ່ານ ແສງ​ອາ​ລຸນ ສີ​ລະ​ປັນ­ຍາຮອງ​ປະ­ທານ​ກວດ​ກາ​ພັກ-ລັດ ແຂວງ​ສະ­ຫວັນ​ນະ​ເຂດ, ທ່ານ ໄຊ​ຍະເສນ ແກ້ວ​ວິ­ໄລ​ສັກ ຫົວ­ໜ້າ​ຂະ­ແໜງທາງ­ບົກພະ​ແນກ​ໂຍ­ທາ​ທິ​ການ ແລະ​ຂົນສົ່ງ​ແຂວງ, ພ້ອມ​ດ້ວຍ​ທີມ​ງານ​ວິ­ຊາ​ການສົມ­ທົບ​ກັບ​ບໍ­ລິ­ສັດ​ວີ​ແອວ​ພີ​ພັດ­ທະ­ນາ​ກໍ່ສ້າງ​ຈຳ­ກັດ ຜູ້​ຮັບ​ເໝົາ​ໂຄງ­ການ​ກໍ່­ສ້າງຂົວ 18 ແຫ່ງ​ລຽບ​ແຄມ​ຂອງ ໄດ້​ພ້ອມກັນ​ລົງ​ຕິດ­ຕາມ​ຄວາມ​ຄືບ​ໜ້າ​ຂອງ​ໂຄງການ​ກໍ່­ສ້າງ​ຂົວ​ດັ່ງ­ກ່າວ, ເປົ້າ​ໝາຍ​ກໍ​ເພື່ອເປັນ​ການ​ກວດ­ກາ​ການ​ລົງ­ທຶນ​ແຕ່​ຫົວ­ທີ​ທີ່​ລັດ­ຖະ­ບານ​ວາງ​ອອກ​ໃນ​ດຳ­ລັດ​ເລກ​ທີ 01/ລບ.

ໂຄງ­ການ​ກໍ່­ສ້າງ​ປັບ­ປຸງ​ຂົວ 18 ແຫ່ງຕາມ​ເສັ້ນ­ທາງ 11 E ລຽບ​ແຄມ​ຂອງນັບ​ແຕ່​ເທ­ສະ​ບານ​ເມືອງ​ໄກ­ສອນ​ພົມ​ວິຫານຫາ​ເມືອງ​ໄຊ​ພູ​ທອງ ລວມ​ມີ​ມູນ​ຄ່າທັງ​ໝົດ 139 ຕື້​ກວ່າ​ກີບ ໃນ​ນີ້​ງົບ​ປະມານ 50% ແມ່ນ​ເປັນ​ທຶນ​ຂອງ​ກະ­ຊວງ ໂຍ­ທາ​ທິ​ການ ແລະ​ຂົນ­ສົ່ງ (ກອງ​ທຶນທາງ) ແລະ ​ອີກ 50% ແມ່ນ​ເປັນ​ທຶນຂອງ​ແຂວງ ໂດຍ​ຂົວ​ທັງ​ໝົດ​ແມ່ນ​ຈະສ້າງ​ເປັນ​ຂົວ​ເບ​ຕົງເສີມ​ເຫຼັກ​ໃຫ້​ສຳ­ເລັດ​ໃນ​ປີ 2019 ແລະ ໃນ​ສົກ​ປີ 2015-2016 ນີ້ ໃຫ້​ແລ້ວ​ກ່ອນ ຈຳ­ນວນ 6 ແຫ່ງ​ຄື:ຂົວ​ຫ້ວຍ​ສົ້ມ­ປ່ອຍ, ຂົວ​ຫ້ວຍ​ຍາງ, ຂົວ​ຫ້ວຍ​ເດື່ອ (ເມືອງ​ໄກສອນພົມ­ວິ­ຫານ), ຂົວ​ຫ້ວຍ​ສວນ​ອີ້ງ, ຂົວ​ຫ້ວຍ​ກົບ ແລະ​ຂົວ​ຫ້ວຍ​ມະ​ຍະ (ເມືອງໄຊ​ພູທອງ).

ໂອ­ກາດ​ນີ້ ທ່ານ ລັດ​ສະ­ໝອນ ພົມມະ­ຫາ­ວົງ ຕາງ­ໜ້າ​ບໍ­ລິ­ສັດ​ວີ​ແອວ​ພີ​ພັດທະ​ນາ​ກໍ່­ສ້າງ​ຈຳ­ກັດ​ໃຫ້​ສຳ­ພາດ​ວ່າ: ມາຮອດ​ປະ­ຈຸ​ບັນ​ການ​ກໍ່­ສ້າງ​ຂົວ 6 ແຫ່ງ ແມ່ນ​ມີ​ຄວາມ​ຄືບ​ໜ້າ​ກວ່າ 50% ຂອງແຜນ­ການ, ພາຍ­ຫຼັງ​ທີ່​ໄດ້​ຈັດ​ຕັ້ງ​ປະ­ຕິ­ບັດມາ​ແຕ່​ເດືອນ​ພະ­ຈິກ​ປີ­ຜ່ານ­ມາ ຊຶ່ງ​ໜ້າວຽກ​ທີ່​ພວມ​ຂຸ້ນ­ຂ້ຽວ​ໃນ​ປະ­ຈຸ​ບັນ​ແມ່ນການ​ເຮັດ​ລຳ​ເສົາ, ຫຼໍ່​ຂາງ ແລະ​ວຽກແຜ່ນ​ພື້ນ​ຂອງ​ຂົວ ຊຶ່ງ​ເປັນ​ໜ້າ​ວຽກ​ທີ່​ສຳຄັນ ແລະ​ຖ້າ​ຫາກ​ຜ່ານ​ຂັ້ນ​ຕອນ​ນີ້​ໄປ​ໄດ້; ໜ້າ​ວຽກ​ອື່ນໆ​ເປັນ­ຕົ້ນ​ກໍ​ແມ່ນ​ການ​ເທໜ້າ​ຂົວ ແລະ​ການ​ເຮັດ​ກັນ​ເຈື່ອນຈະ​ສາມາດ​ປະ­ຕິ­ບັດ​ໄດ້​ຢ່າງ​ວ່ອງ­ໄວ ຕາມ​ການຄາດ​ຄະ­ເນ​ຂົວ 6 ແຫ່ງ​ນີ້​ແມ່ນ​ຈະ​ໃຫ້​ສຳເລັດ​ກ່ອນ​ລະ­ດູ­ຝົນ ຫຼື ປະ­ມານ​ຊ່ວງ​ເດືອນ 6-7 ຂອງ​ປີ​ນີ້.

ການ​ລົງ​ກວດ­ກາ​ເບິ່ງ​ຄວາມ​ຄືບ​ໜ້າຂອງ​ໂຄງ­ການ​ຄັ້ງ​ນີ້ ແມ່ນ​ເປັນ​ການ​ກວດ ສະ­ເພາະ​ໂຄງ­ການ​ກໍ່­ສ້າງ​ຂົວ​ທີ່​ເປັນ​ຮ່ວງທຶນ​ຂອງ​ແຂວງ​ເປັນ​ຜູ້​ຮັບ­ຜິດ­ຊອບ ນັ້ນ​ກໍຄື​ຂົວ​ຫ້ວຍ​ສວນ​ອີ້ງ, ຂົວ​ຫ້ວຍ​ກົບ ແລະ ຂົວ​ຫ້ວຍ​ມະ​ຍະທີ່​ກຳ­ລັງ​ຂຸ້ນ­ຂ້ຽວ​ກໍ່­ສ້າງ​ໃນ​ປະ­ຈຸ​ບັນ.

ທີ່ມາ:logo