ກອງປະຊຸມປຶກສາຫາລືລະດັບຊາດ ກ່ຽວກັບການສິດສອນພາສາອັງກິດທີ່ມີປະສິດທິຜົນ ໃນຊັ້ນປະຖົມສຶກສາ ສຳລັບ ປ3-ປ5 ຈັດຂຶ້ນໃນວັນທີ 29 ເມສາຜ່ານມານີ້ ທີ່ໂຮງແຮມກຸຫຼາບ ນະຄອນຫຼວງວຽງຈັນ ໂດຍມີທ່ານ ລີຕູ້ ບົວປາວ ລັດຖະມົນຕີຊ່ວຍວ່າການ ກະຊວງສຶກສາທິການ ແລະ ກີລາ ທ່ານຜູ້ຕາງໜ້າຈາກອົງການຜູ້ໃຫ້ທຶນ ບັນດາຫົວໜ້າກົມ ພະແນກການ ຫ້ອງການ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ການປະຊຸມໃນຄັ້ງນີ້ ແມ່ນເພື່ອສະຫຼຸບຖອດຖອນບົດຮຽນກັບບັນດາແຂວງ ແລະ ໂຮງຮຽນທີ່ໄດ້ຈັດຕັ້ງປະຕິບັດໂຄງການດັ່ງກ່າວນີ້ມາແລ້ວ ເຫັນວ່າມີຜົນປະໂຫຍດໃນການສືບຕໍ່ ໂດຍສະເພາະໃນ 3 ແຂວງຄື: ແຂວງຫຼວງພະບາງ (ເມືອງຊຽງເງິນ) ແຂວງບໍລິຄຳໄຊ (ເມືອງທ່າພະບາດ) ແລະ ນະຄອນຫຼວງວຽງຈັນ (ເມືອງສີສັດຕະນາກ) ເຊິ່ງຈະໄດ້ພ້ອມກັນຄົ້ນຄວ້າ ປຶກສາຫາລືເຖິງຮູບແບບໃນການຈັດຕັ້ງປະຕິບັດ ການກວດກາຕິດຕາມປະເມີນຜົນ ລວມທັງການໃຫ້ການຊ່ວຍເຫຼືອອົບຮົມຄູ.
ທັງນີ້ກໍ່ເພື່ອຊອກຫາຈຸດດີ ຂໍ້ຄົງຄ້າງ ບັນຫາທີ່ພົບໃນການຈັດຕັ້ງປະຕິບັດຜ່ານມາ ເພື່ອຫາວິທີທາງໃນການປັບປຸງແກ້ໄຂ ເປັນບົດຮຽນໃນການຂະຫຍາຍໂອກາດຂອງໂຄງການໃຫ້ກວ້າງຂວາງອອກໄປ ເຮັດໃຫ້ການດຳເນີນໂຄງການມີປະສິດທິພາບດີຂຶ້ນ ສາມາດເຂົ້າເຖິງປັດໄຈທີ່ແທ້ຈິງ ແກ້ໄຂບັນຫາທີ່ເປັນພື້ນຖານ ເພຶ່ອເຮັດໃຫ້ການຈັດຕັ້ງຜັນຂະຫຍາຍວຽກງານດັ່ງກ່າວ ໄດ້ຕາມວັດຖຸປະສົງທີ່ວາງໄວ້ ເປັນການປະກອບສ່ວນໂດຍຕົງ ຕໍ່ການພັດທະນາການສຶກສາຂັ້ນພື້ນຖານ ພ້ອມກັບການກຽມຄວາມພ້ອມໃຫ້ແກ່ປະເທດ ໃນການກ້າວເຂົ້າສູ່ປະຊາຄົມເສດຖະກິດອາຊຽນ ໃນໂອກາດອັນໃກ້ນີ້.
ທີ່ມາ http://www.vientianemai.net/teen/khao/1/11708