ດອກຈຳປາຣີສອດ ເປັນໂຮງແຮມໜຶ່ງໃນ ຈຳນວນ 10 ແຫ່ງໃນທົ່ວປະເທດລາວທີ່ໄດ້ຮັບລາງວັນເປັນໂຮງແຮມສີຂຽວລະດັບອາຊຽນຊຶ່ງໂຮງແຮມແຫ່ງນີ້ຕັ້ງຢູ່ກິໂລແມັດທີ 23 ເສັ້ນທາງສະຫວັນນະເຂດ-ເຊໂນຊຶ່ງເປັນໂຮງແຮມທີ່ໃຫຍ່ມີບໍລິການຫຼາກຫຼາຍເປັນຕົ້ນ: ມີຫ້ອງພັກ, ມີຫ້ອງປະຊຸມ, ມີສະລອຍນ້ຳ ແລະ ມີທິວທັດທຳມະຊາດທີ່ສວຍງາມ, ພ້ອມນັ້ນກໍໄດ້ມີການເຄື່ອນໄຫວບໍລິການຕາມມາດຖານຂອງອາຊຽນວາງອອກຊຶ່ງໃນນັ້ນໄດ້ເນັ້ນໜັກໃຫ້ຖືກຕ້ອງຕາມ 11 ມາດຖານທີ່ອາຊຽນໄດ້ກຳນົດໄວ້ຄື: ປະຕິບັດງານທາງດ້ານສິ່ງແວດລ້ອມ, ການນຳໃຊ້ຜະລິດຕະພັນທີ່ເປັນມິດກັບສິ່ງແວດລ້ອມ, ຮ່ວມມືກັບຊຸມຊົນ ແລະ ທ້ອງຖິ່ນ, ການພັດທະນາບຸກຄະລາກອນ, ການຄຸ້ມຄອງຂີ້ເຫຍື້ອ, ການນຳໃຊ້ພະລັງງານຢ່າງມີປະສິດທິພາບ, ການນຳໃຊ້ນ້ຳຢ່າງມີຄຸນນະພາບ, ການຄຸ້ມຄອງຄຸນນະພາບອາກາດພາຍໃນ ແລະ ນອກອາຄານ, ການຄຸ້ມຄອງລະບົບມົນລະພິດທາງສຽງ, ການຄຸ້ມຄອງ ແລະ ບຳບັດນ້ຳເປື້ອນ ແລະ ການກຳຈັດ, ຄຸ້ມຄອງຂີ້ເຫຍື້ອທີ່ມີສານເຄມີນີ້ແມ່ນມາດຕະຖານຫຼັກຂອງອາຊຽນໃນການຕີລາຄາປະເມີນຜົນ.
ດັ່ງນັ້ນ ໃນຄະນະກຳມະການຂັ້ນແຂວງຈິ່ງໄດ້ເກັບກຳເອົາບັນດາໂຮງແຮມພາຍໃນແຂວງຈຳນວນຫຼາຍສະເໜີໄປຍັງຄະນະກຳມະການຂັ້ນສູນກາງແລ້ວກໍມີການຄັດເລືອກບັນດາໂຮງແຮມແຫ່ງຕ່າງໆສົ່ງເຂົ້າຊີງລາງວັນໂຮງແຮມສີຂຽວໂດຍພິທີຄັ້ງນີ້ໄດ້ຈັດຂຶ້ນທີ່ປະເທດພີລິບປິນ ແລະ ໂຮງແຮມດອກຈຳປາຣີສອດຊຶ່ງເປັນໂຮງແຮມ ໜຶ່ງດຽວຂອງແຂວງສະຫວັນນະເຂດກໍໄດ້ຮັບລາງວັນອັນຊົງກຽດນີ້ໄປຄອງ.
ມາໃນວັນທີ 25 ມີນາ 2016 ພະແນກຖະແຫຼງຂ່າວ-ວັດທະນະທຳແລະທ່ອງທ່ຽວແຂວງສະຫວັນນະເຂດຮ່ວມກັບກຸ່ມທຸລະກິດໂຮງແຮມ, ເຮືອນພັກ ແລະຮ້ານອາຫານກໍໄດ້ຈັດພິທີມອບ-ຮັບລາງວັນດັ່ງກ່າວນີ້ຂຶ້ນທີ່ໂຮງແຮມດາວສະຫວັນນະເຂດໂດຍການໃຫ້ກຽດມອບໂດຍທ່ານຄຳພູນຕຸໄພທູນຮອງເຈົ້າແຂວງໆສະຫວັນນະເຂດແລະຮັບໂດຍທ່ານສຸລິນອິນທະວົງຜູ້ຈັດການໃຫຍ່ໂຮງແຮມດອກຈຳປາໂດຍຊ້ອງ ໜ້າ ທ່ານ ນາງ ດາວວອນ ໄຊສຸລຽນ ຫົວໜ້າພະແນກຖະແຫຼງຂ່າວ-ວັດທະນະທຳແລະທ່ອງທ່ຽວແຂວງພ້ອມດ້ວຍຄະນະບໍລິຫານງານກຸ່ມທຸລະກິດໂຮງແຮມ, ເຮືອນພັກ ແລະຮ້ານບັນເທີງເຂົ້າຮ່ວມ ເປັນສັກຂີພິຍານໃນຄັ້ງນີ້ດ້ວຍ.
ທີ່ມາ: