ບໍລິສັດເທີນຫີນບູນພາວເວີ ຈຳກັດ ໄດ້ຕິດຕັ້ງກັງຫັນໃໝ່ໃຫ້ແກ່ເຮືອນຈັກເທີນຫີນບູນຢູ່ແຂວງຄຳມ່ວນຊຶ່ງຈະເຮັດໃຫ້ບໍລິສັດສາມາດຜະລິດໄຟຟ້າເພີ່ມຂຶ້ນຈາກການນຳໃຊ້ນ້ຳເທົ່າເດີມກັງຫັນໃໝ່ນີ້ມີກຳລັງການຜະລິດ 120 ເມກາວັດ ໄດ້ເລີ່ມດຳເນີນການຜະລິດໄຟໃນວັນທີ 28 ກຸມພາທີ່ຜ່ານມານີ້ ແລະການ ທົດສອບຫວ່າງມໍ່ໆນີ້ໄດ້ສະແດງໃຫ້ເຫັນວ່າກັງຫັນດັ່ງກ່າວນັ້ນຜະລິດພະລັງງານໄດ້ປະສິດທິພາບສູງກວ່າຕົວເກົ່າ.
ທ່ານ ຄອນສະຫວາດ ເມືອງປາກ ຫົວໜ້າຝ່າຍ ການຜະລິດຂອງ THPC ກ່າວວ່າການປ່ຽນຖ່າຍກັງຫັນຄັ້ງນີ້ແມ່ນກັງຫັນທີ່ມີກຳລັງການຜະລິດ 110 ເມກາວັດ ຊຶ່ງເປັນໜ່ວຍທີ່ຕິດຕັ້ງໃຫ້ແກ່ ໂຄງການເທີນຫີນບູນດັ້ງເດີມໃນປີ 1997 ທີ່ຈະເພີ່ມການຜະລິດ “ນີ້ແມ່ນການພິຈາລະນາທີ່ສຳຄັນຂອງຜູ້ປະກອບການພະລັງງານໄຟຟ້ານ້ຳຕົກ, ໂດຍສະເພາະຢ່າງຍິ່ງແມ່ນໃນໄລຍະເວລາທີ່ຝົນຕົກບໍ່ຫຼາຍຄືໃນອະດີດຜ່ານມາ”.
ລະດັບຕ່ຳຂອງປະລິມານນ້ຳຝົນໃນ ປີ 2015 ໄດ້ເປັນອຸປະສັກຕໍ່ຄວາມສາມາດໃນການທຳງານຂອງເຄື່ອງຈັກຜະລິດພະລັງງານໄຟຟ້າໃຫ້ຜະລິດບໍ່ໄດ້ເຕັມກຳລັງ ແລະການຍົກລະດັບເຕັກໂນໂລຊີທີ່ທັນສະໄໝສາມາດຊ່ວຍບັນເທົາບັນຫາດັ່ງກ່າວໄດ້.
ທ່ານ ຄອນສະຫວາດ ຍັງໄດ້ກ່າວ ຕື່ມອີກວ່າ “ຢູ່ THPC ພວກເຮົາຕ້ອງການໃຫ້ກັງຫັນດຳເນີນການຜະລິດໄດ້ຢ່າງມີປະສິດທີ່ພາບສູງສຸດຫຼາຍກວ່າການຜະລິດເຕັມກຳລັງສູງສຸດ, ພາຍໃຕ້ທາງເລືອກຂອງກັງຫັນໃໝ່ນີ້ຈະສາມາດຜະລິດພະລັງງານໄຟຟ້າໄດ້ເພີ່ມຂຶ້ນອີກ 10 ເມກາວັດຈາກປະລິມານນ້ຳເທົ່າເດີມ”ການປ່ຽນຖ່າຍກັງຫັນແມ່ນໄດ້ເລີ່ມຂຶ້ນໃນເດືອນທັນວາປີກາຍນີ້, ທີມງານສ້ອມແປງໃຫຍ່ປະກອບດ້ວຍພະນັກງານຈາກ THPC ຮ່ວມກັບວິສະວະກອນທີ່ມີຄວາມຊຳໜິຊຳນານຈາກບໍລິສັດ Rainpower ແລະ Alstom ຈາກປະເທດນໍເວ ວຽກການປ່ຽນຖ່າຍໄດ້ສຳເລັດກ່ອນກຳນົດໝາຍພ້ອມກັບຄວາມປະທັບໃຈຂອງທີມງານຄົນລາວໃນການຮ່ວມງານກັບຄູ່ຮ່ວມງານຕ່າງປະເທດ.
ທ່ານ Alf Steiner Jensen ຫົວໜ້າພາກສະໜາມຂອງບໍລິສັດ Rainpower ກ່າວວ່າ ທີມງານຂອງ THPC ເຮັດວຽກວ່ອງໄວ, ມີປະສິດທິພາບ ແລະ ປອດໄພ, ເຮັດໃຫ້ວຽກສຳເລັດທັນເວລາພ້ອມກັບຜົນງານທີ່ດີເລີດ.
ກັງຫັນໜ່ວຍທີສອງຈະຖືກປ່ຽນ ຖ່າຍໃນທ້າຍປີນີ້, ຈະເຮັດໃຫ້ THPC ເກັບຄືນໄດ້ຜົນຜະລິດທີ່ເສຍໄປໃນຊ່ວງລະດູຝົນໃນປີກາຍນີ້ ທ່ານ ສຸລິເດດ ເບົ້າ ມະນີໂຄດ ຮອງຜູ້ອຳນວຍການໃຫຍ່ຂອງບໍລິສັດໄດ້ກ່າວວ່າ “ຖ້າຝົນຕົກຫຼາຍໃນປີນີ້ພວກເຮົາຈະສາມາດຜະລິດໄດ້ເຕັມທີ່ເຖິງແມ່ນວ່າລະດັບນ້ຳຈະຕ່ຳພວກເຮົາກໍສາມາດທີ່ຈະປະຕິບັດຕາມພັນທະທາງການເງິນຕໍ່ກັບລັດຖະບານ ແລະຜູ້ໃຫ້ກູ້ຢືມພ້ອມກັນນີ້ພວກເຮົາກໍຍັງສາມາດຊ່ວຍເຫຼືອຊຸມຊົນທ້ອງຖິ່ນນຳ.
“ເຖິງຢ່າງໃດກໍ່ຕາມໃນການຜະລິດ ເຕັມຮູບແບບນັ້ນພວກເຮົາຈະສາມາດຊຳລະໃຫ້ຄູ່ຮ່ວມງານຂອງພວກເຮົາໄດ້ຫຼາຍຂຶ້ນ ແລະປະກອບສ່ວນຫຼາຍຂຶ້ນໃຫ້ແກ່ການພັດທະນາປະເທດຊາດ; ກັງຫັນໜ່ວຍໃໝ່ນີ້ຈະຊ່ວຍເຮັດໃຫ້ການປະກອບສ່ວນຫຼາຍຂຶ້ນໄດ້ຕໍ່ໄປ.
ທີ່ມາ: 