ເອເອຟພີລາຍງານວັນທີ 30 ມີນາວ່າ ເຈົ້າໜ້າທີ່ສູນສັດປ່າເຄນຢາ ຍິງສິງເພດຜູ້ຕາຍຫຼັງສິງຍ່າງອອກຈາກອຸທິຍານແຫ່ງຊາດໄນໂຣບີ ແລະກັດຊາຍທີ່ສັນຈອນໄປມາຄົນໜຶ່ງບາດເຈັບທີ່ເຂດໄອຊິນຢາ ບໍລິເວນທາງພາກໃຕ້ຂອງນະຄອນໄນໂຣບີ ເມືອງຫຼວງ ກ່ອນເຈົ້າໜ້າທີ່ຈະນຳຊາຍເຄາະຮ້າຍສົ່ງໂຮງໝໍ ນັບເປັນຄັ້ງທີ 4 ຂອງປີທີ່ໂຕສິງຫຼຸດອອກມາຈາກອຸທິຍານແຫ່ງຊາດໄນໂຣບີ ແລະເປັນຄັ້ງທີ 2 ທີ່ມີຜູ້ບາດເຈັບ.
ທັງນີ້ ອຸທິຍານແຫ່ງຊາດດັ່ງກ່າວຖືກລ້ອມຮອບດ້ວຍເມືອງທີ່ກຳລັງເຕີບໂຕຢ່າງວ່ອງໄວ ແລະມີປະຊາກອນຫຼາຍກວ່າ 3 ລ້ານຄົນ ທັງຍັງບໍ່ມີການລ້ອມຮົ້ວໂດຍຮອບເພື່ອໃຫ້ສັດອອກຫາຫຍ້າກິນໄດ້ ບັນດາສິງໃນເຄນຢາກຳລັງປະສົບບັນຫາໜັກ ເພາະຊຸມຊົນເມືອງຮອບໆທີ່ຢູ່ຂອງສັດປ່າຂະຫຍາຍຕົວຫຼາຍຂຶ້ນ ເຮັດໃຫ້ເສັ້ນທາງການເດີນທາງຂອງສິງເຫຼົ່ານີ້ໄດ້ຮັບຜົນກະທົບ.
ນັກອະນຸຮັກຍັງເຜີຍວ່າສິງເຫຼົ່ານີ້ທີ່ອາໄສຢູ່ໃນບໍລິເວນນີ້ມາກ່ອນທີ່ມະນຸດຈະມາຕັ້ງຖິ່ນຖານ ຊຶ່ງສິງເຫຼົ່ານັ້ນບໍ່ສາມາດຍ້າຍບ່ອນຢູ່ ຫຼື ອາໄສຢູ່ໃນເມືອງໄດ້ ມະນຸດຈິ່ງຄວນຍ້າຍອອກໄປຈາກຖິ່ນທີ່ຢູ່ຂອງສິງ.