ຄືດັ່ງພວກເຮົາຮູ້ນໍາກັນວ່າບຸນປີໃໝ່ລາວ ພສ 2559 ໄດ້ໝູນວຽນມາບັນຈົບຄົບຮອບອີກວາລະໜຶ່ງ, ຊຶ່ງປະຊາຊົນເຮົາຕ່າງກໍຈະໄດ້ພ້ອມພາກັນສະຫລອງດ້ວຍບັນຍາກາດຟົດຟື້ນມ່ວນຊື່ນຕາມຮີດຄອງປະເພນີອັນດີງາມຂອງຊາດ, ສໍາລັບປີນີ້ປະກົດວ່າພິເສດກວ່າທຸກປີ, ເນື່ອງຈາກລັດຖະບານໄດ້ອອກແຈ້ງການພັກລັດຖະການຫລາຍວັນຄືນັບແຕ່ວັນທີ 12 – 16 ເມສາ ແລະ ຕໍ່ໃສ່ພັກວັນປົກະຕິຄືວັນເສົາ-ວັນອາທິດ, ຈຶ່ງເຮັດໃຫ້ມື້ພັກໃນໂອກາດບຸນດັ່ງກ່າວແກ່ຍາວຫລາຍວັນ, ອັນເປັນເງື່ອນໄຂເໝາະສົມໃຫ້ຜູ້ທີ່ຕ້ອງການໄປທ່ອງທ່ຽວ ຫລື ໄປຢາມຍາດພີ່ນ້ອງໃນທ້ອງຖິ່ນຕ່າງໆ, ຊຶ່ງອາດມີບາງຄົນ, ບາງຄອບຄົວຕ້ອງໄດ້ປະເຮືອນຊານຫລາຍວັນ ແລະ ອາດເປັນຊ່ອງຫວ່າງພາໃຫ້ເກີດອັກຄີໄພ ແລະ ຄົນບໍ່ດີສວຍໂອກາດກໍ່ອາດຊະຍາກໍາ.

ດັ່ງນັ້ນເພື່ອຮັບປະກັນຄວາມປອດໄພທາງດ້ານຊີວິດ ແລະ ຊັບສີນໃນຊ່ວງໄລຍະບູນປີໃໝ່ນີ້, ພວກເຮົາຈະຕ້ອງໄດ້ພ້ອມກັນປະຕິບັດຄໍາສັ່ງ ແລະ ແຈ້ງການຂອງອໍານາດການປົກຄອງ ແລະ ເຈົ້າໜ້າທີ່ກ່ຽວໃຫ້ເຂັ້ມງວດ,ສິ່ງສໍາຄັນແມ່ນຕ້ອງຍົກສູງສະຕິລະວັງຕົວປົກປັກຮັກສາຊັບສົມບັດຂອງຕົນໃຫ້ດີ,ກ່ອນອອກຈາກເຮືອນຊານບ້ານຊ່ອງຕ້ອງອັດປະຕູໃຫ້ແໜ້ນໜາດີພ້ອມແຈ້ງເຈົ້າໜ້າທີ່ຢູ່ໃກ້ບ້ານຊ່ວຍສອດສ່ອງຕິດຕາມ,ການໃຊ້ລົດໃຊ້ຖະໜົນຕ້ອງມີສະຕິເຄົາລົບລະບຽບຈາລະຈອນຢ່າງເຂັ້ມງວດ,ມີມາລະຍາດ,ຮູ້ໃຫ້ກຽດອະໄພເຊິ່ງກັນ ແລະ ກັນ ເພື່ອຫລີກລ້ຽງການເກີດອຸປະຕິເຫດ,ສ່ວນການຊຸມແຊວຫລີ້ນກິນກໍໃຫ້ຢູ່ບົນຈິດໃຈປະຢັດມັດທະຍັດ,ບໍ່ຟູມເຟືອຍ,ການຫົດສົງກັນກໍໃຫ້ໃຊ້ນໍ້າທີ່ສະອາດ,ບໍ່ຄວນເອົານໍ້າເປື້ອນ,ນໍ້າກ້ອນດຶກແກວ່ງໃສ່ກັນ,ສ່ວນການນຸ່ງຖືກໍໃຫ້ມີຄວາມຈົບງາມ,ໂດຍສະເພາະແມ່ຍິງບໍ່ຄວນແຕ່ງກາຍນຸ່ງຖືຍົ້ວຍວນ, ສັ້ນເຂີນ ແລະ ປະພືດຕົນແບບລາມົກອານາຈານຕ່າງໆ,ຖ້າພວກເຮົາພ້ອມກັນປະຕິບັດລະບຽບໄດ້ຄືແນວນີ້ກໍຮັບປະກັນວ່າການສະເຫລີມສະຫລອງບຸນປີໃໝ່ລາວປີນີ້ຈະມີແຕ່ຄວາມມ່ວນຊື່ນ, ມີຄວາມເປັນລະ ບຽບຮຽບຮ້ອຍ, ສະຫງົບປອດໄພ ແລະ ຮັກສາໄດ້ຮີດຄອງປະເພນີອັນດີງາມຂອງຊາດລາວເຮົາໄວ້ໄດ້ ແລະ ອີກບັນຫາໜຶ່ງຢາກຢໍ້າຄືນໃຫ້ທຸກຄົນ, ທຸກພາກສ່ວນສັງຄົມຕ້ອງພ້ອມກັນປະຕິບັດແຈ້ງການຂອງລັດຖະບານຢ່າງເຂັ້ມງວດ ເປັນຕົ້ນ:ການຈັດງານລ້ຽງສັງສັນຕ້ອງໃຫ້ຢູ່ບົນຈິດໃຈປະຢັດມັດທະ ຍັດແທ້ຈິງ, ບໍ່ນໍາໃຊ້ງົບປະມານ, ພາຫານະຂອງລັດໄປທ່ຽວຫລີ້ນເດັດຂາດ ແລະ ໃຫ້ຖືເອົາການສະຫລອງບຸນດັ່ງກ່າວເປັນການຮັກສາຮີດຄອງວັດທະນາທໍາປະເພນີອັນດີງາມຂອງຊາດຢ່າງແທ້ຈິງຕິດພັນກັບການສົ່ງເສີມການທ່ອງທ່ຽວຂອງ.

ແຫລ່ງຂ່າວຈາກ: ລາວພັດທະນາ