ປະທານາທິບໍດີຟຣອງຊົວ ໂອລລອງຂອງຝຣັ່ງເຜີຍວ່າ ຈະບໍ່ສະໜັບສະໜູນເລື່ອງແກ້ລັດຖະທຳມະນູນ ຫຼັງເກີດເຫດກໍ່ການຮ້າຍນະຄອນຫຼວງປາຣີແລ້ວ ຫຼັງຈາກສະພາບໍ່ສາມາດຕົກລົງກັບວຸດທິສະພາທີ່ມີຝ່າຍຄ້ານຄອງສຽງສ່ວນຫຼາຍ.
ສຳນັກຂ່າວຕ່າງປະເທດລາຍງາຍວ່າ: ປະທານາທິບໍດີຟຣອງຊົວ ໂອລລອງຖະແຫຼງທາງໂທລະສັບວ່າ ໄດ້ສັ່ງຢຸດຕິການອະພິປາຍໃນສະພາເລື່ອງແກ້ໄຂລັດຖະທຳມະນູນຕາມທີ່ໄດ້ສະເໝີ ຫຼັງເກີດເຫດກຸ່ມລັດອິສລາມ (ໄອເອສ) ກໍ່ການຮ້າຍຫຼາຍຮອບໃນນະຄອນຫຼວງປາຣີເມື່ອວັນທີ 13 ພະຈິກປີຜ່ານມາ ສັງຫານຄົນໄປຫຼາຍເຖິງ 130 ຄົນ ເນື່ອງຈາກທັງສອງສະພາບໍ່ສາມາດຕົກລົງກັນໄດ້ກ່ຽວກັບມາດຕະການອະນຸຍາດໃຫ້ເພີກຖອນສັນຊາດຝຣັ່ງຂອງຜູ້ຕ້ອງໂທດກໍ່ການຮ້າຍ ຂໍແຈ້ງໃຫ້ຊາບວ່າຝ່າຍຄ້ານບາງສ່ວນຄັດຄ້ານບໍ່ໃຫ້ແກ້ໄຂລັດຖະທຳມະນູນເລີຍ ຊຶ່ງເປັນທັດສະນະຄະຕິທີ່ໜ້າເສຍໃຈຢ່າງຍິ່ງ, ແນວໃດກໍ່ຕາມ ລາວຂໍຮັບປາກວ່າ ເຖິງວ່າໄດ້ຍົກເລີກແຜນການປະຕິຮູບລັດຖະທຳມະນູນໄປແລ້ວ ແຕ່ຈະບໍ່ບ່ຽງປະເດັນໄປຈາກສິ່ງທີ່ໄດ້ຮັບປາກໄວ້ວ່າຈະປົກປ້ອງຄວາມປອດໄພຂອງປະເທດ.
ຂໍ້ສະເໝີເພີກຖອນສັນຊາດຝຣັ່ງເຮັດໃຫ້ເກີດການຖົກຖຽງໃນລັດຖະສະພາຝຣັ່ງແບບດຸເດືອດມາຫຼາຍເດືອນ ແລະມີສຽງວິຈານວ່າເປັນພຽງມາດຕະການດ້ານສັນຍະລັກທີ່ປັດສະຈາກປະສິດທິພາບ ນອກຈາກມາດຕະການນີ້ແລ້ວ ຂໍ້ສະເໝີຂອງປະທານາທິບໍດີໂອລລອງເລື່ອງແຊກລະບຽບການປະກາດສະຖານະການສຸກເສີນໄວ້ໃນລັດຖະທຳມະນູນກໍເປັນອັນຕົກໄປນຳ.