ຫວຽດນາມປະກາດຈັດ ວັນວິສາຂະບູຊາໃນຕົ້ນເດືອນ ພຶດສະພາ ຕາມມະຕິຂອງອົງການສະຫະປະຊາຊາດ ເຊິ່ງຄາດວ່າຈະມີຜູ້ແທນອົງການຂອງຊາວພຸດ ກວ່າ 1.000 ຄົນຈາກທົ່ວໂລກເຂົ້າຮ່ວມບຳເພັນກຸສົນກັບຊາວຫວຽດນາມເປັນໝື່ນໆ ເລື່ອງນີ້ມີຂຶ້ນໃນ ວັນອາທິດທີ່ຜ່ານມາ ຂະນະທີ່ອົງການພຸດທະສາສະນິກສຳພັນແຫ່ງຊາດກຳລັງກຽມຄວາມພ້ອມໃນຂັ້ນສຸດທ້າຍ.
ວັນວິສາຂະບູຊາປີນີ້ຈະຈັດຂຶ້ນທີ່ວັດໃຫຍ່ແຫ່ງໜຶ່ງເທິງໂນນພູຊານ ເມືອງໃນ ຈ. ນີງບິ່ງ (Ninh Binh) ເຊິ່ງຫ່າງຈາກກຸງຮາໂນຍ ລົງໄປທາງໃຕ້ປະມານ 100 ກິໂລແມັດສື່ຂອງທາງການລາຍງານ.
ວັນວິສາຂະບູຊາ ມີກຳນົດຂຶ້ນລະຫວ່າງວັນທີ່ 7-11 ພຶດສະພາ. ຕາມມະຕິຂອງສະຫະປະຊາຊາດ ເຊິ່ງຈະມີການຈັດ ແບບດຽວກັນນີ້ໃນຫຼາຍໆປະເທດທົ່ວໂລກ ເພື່ອໃຫ້ ຊາວພຸດທະສາສະນິກະຊົນໄດ້ ລຳເລິກເຖິງ 3 ເຫດການສຳຄັນທາງສາດສະໜາທີ່ເກິດຂື້ນໃນ ວັນເພັນເດືອນ 6 ຄື ການປະສູດ ຕັດຮູ້ ແລະ ປະລິນິບພານຂອງອົງພະສຳມາສຳພຸດທະເຈົ້າ ອັນເປັນທີ່ໜ້າອັດສະຈັນ ເຖິງແມ່ນວ່າທັງ 3 ເຫດການມະຫາມຸງຄຸນນີ້ຈະເກີດຂຶ້ນໃນເວລາຫ່າງກັນຫຼາຍສິບປີກໍຕາມ.
ຄາດວ່າຈະມີຜູ້ແທນຈາກອົງການຂອງຊາວພຸດປະມານ 1.500 ຄົນ ຈາກ 95 ປະເທດ ແລະ ດິນແດນທົ່ວໂລກໄປຮ່ວມເຮັດບຸນໃນ ວັນສຳຄັນກັບຊາວພຸດໃນຫວຽດນາມ ນັບເປັນໝື່ນໆ ຄົົນທີ່ວັດບ່າຍດີງ (Bai Dinh) ຊານເມືອງນີງບິ່ງ ສຳລັບບຸກຄົນທົ່ວໄປສາມາດເດີນທາງໄປຍັງແຂວງນີ້ໂດຍສະດວກ ທັງຈາກກຸງຮາໂນຍ ຫຼື ທີ່ອື່ນ ໂດຍທາງອາກາດ ແລະ ທາງບົກ ລວມທັງລົດໄຟໂດຍສານກໍໄດ້.
ວັດແຫ່ງນີ້ມີສູນປະຊຸມທີ່ສາມາດບັນຈຸຜູ້ຄົນໄດ້ປະມານ 3.500 ຄົນ ມີສາລາຫຼັງໃຫຍ່ນ້ອຍອີກຫຼາຍຫຼັງ ມີສະໜາມກວ້າງສຳລັບກາງເຕັນໃຫຍ່ ຄະນະຜູ້ຈັດງານໄດ້ຈັດກຽມ ຈໍມໍນິເຕີຂະໜາດໃຫຍ່ຕິດຕັ້ງຕາມຈຸດຕ່າງໆ ຈັດອາສາສະໝັກກວ່າ 2.000 ຄົນ ເພື່ອຊ່ວຍອຳນວຍຄວາມສະດວກແກ່ຜູ້ໄປຮ່ວມເຮັດບຸນ ຊະເວີນຫວຽດອອນໄລນ໌ ໜັງສືພິມ ອິເລັກໂທຣນິກພາສາຫວຽດນາມລາຍງານ.
ປີນີ້ເປັນປີທີ່ 11 ຂອງການຈັດວັນວິຊາຂະບູຊາໃນຫວຽດນາມຕິດຕໍ່ກັນ ຕາມມະຕິຂອງຢູເອັນ ໂດຍມີເນື້ອຫາສຳຄັນ ປະກອບດ້ວຍ ການປະຊຸມສຳມະນາກ່ຽວກັບພຸດທະສາສະໜາ ການບັນລະຍາຍທຳມະ ພິທີສົງນ້ຳພະ ກິດຈະກຳສະແດງດ້ານວັດທະນະທຳ ແລະ ປະເພນີ ມີກິດຈະກຳການອອກລ້ານ ແລະ ເປັນປີອຳອິດທີ່ຈະມີການຈັດສາຍຮູບເງົາກ່ຽວກັບ ພຸດທະ ສາສະໜາ ແລະ ບູຮານຄະດີພຸດທະສາສະໜາຈຳນວນກວ່າ 100 ເລື່ອງ ທັງຮູບເງົາເລື່ອງຍາວ ຮູບເງົາສານລະຄະດີຍາວ ສາລະຄະດີສັ້ນໆ ແລະ ຮູບເງົາກາລ໌ຕູນ ພຸດສາສະໜາຈາກທົ່ວໂລກ.