ຂປລ. ປັດຈຸບັນ ນັກວິຊາການ ພວມຂຸ້ນຂ້ຽວກໍ່ສ້າງງານ ປະຕິມະກຳຊາຍ ທີ່ສວຍງາມ ແລະ ຍິ່ງໃຫຍ່ກວ່າປີຜ່ານມາ ເພື່ອໃຫ້ສຳເລັດກ່ອນ ມື້ບຸນປີໃໝ່ລາວ ຄື ວັນທີ 13-16 ເມສາ ທີ່ຈະເຖິງນີ້ ອັນຈະສາມາດດຶງດູດ ນັກທ່ອງທ່ຽວ ທັງພາຍໃນ ແລະ ຕ່າງປະເທດ ໃຫ້ເດີນທາງເຂົ້າມາທ່ອງທ່ຽວ ສປປ ລາວ ໃນໄລຍະບຸນປີໃໝ່ລາວ ທັງນີ້ ເພື່ອເປັນການສົ່ງເສີມ ວັດທະນະທຳລາວ ແລະ ການທ່ອງທ່ຽວ ໃຫ້ມີບັນຍາກາດ ເບີກບານມ່ວນຊື່ນ.
ນັກວິຊາການ ທີ່ຮັບຜິດຊອບການກໍ່ສ້າງດັ່ງກ່າວ, ໄດ້ໃຫ້ສຳພາດຕໍ່ນັກຂ່າວ ສຳນັກຂ່າວສານປະເທດລາວ ໃນວັນທີ 29 ມີນາ ນີ້ ວ່າ: ສຳລັບງານ ປະຕິມະກຳຊາຍໃນປີນີ້ ສ່ວນໃຫຍ່ແມ່ນ ຈະສະທ້ອນໃຫ້ເຫັນເຖິງ ວິຖີການດຳລົງຊີວິດ, ວັດທະນະທຳ ແລະ ປະເພນີ ທີ່ເປັນເອກະລັກອັນດີງາມ ຂອງຊາດລາວ ໂດຍສະເພາະ ປະຕິມະກຳຊາຍທີ່ເປັນ ຮູບພະພຸດທະຮູບ, ຮູບຊ້າງ, ປະຕູໄຊ, ຮູບພະທາດຫລວງ ພ້ອມນີ້ ຍັງມີປະຕິມະກຳຊາຍ ທີ່ເປັນຮູບພາບສັນຍາລັກ ຂອງບາງປະເທດອາຊຽນ ເຊັ່ນ: ປະເທດໄທ, ສິງກະໂປ ແລະ ບຣູໄນ.
ສຳລັບງານປະຕິມະກຳຊາຍ ທີ່ສວຍງາມດັ່ງກ່າວ ໃນບຸນປີໃໝ່ລາວປີນີ້ ແມ່ນປະກອບມີ 10 ກວ່າຜົນງານ ເພີ່ມຈາກປີຜ່ານມາ ທີ່ມີພຽງແຕ່ 5-6 ຜົນງານເທົ່ານັ້ນ.
ແຫລ່ງຂ່າວຈາກ: Pathedlao Lao