ຂປລ: ໃນວັນທີ 28 ມີນາ ນີ້, ຢູ່ທີ່ທຳນຽບປະທານປະເທດ ທ່ານ ເຈືອງເຕິ້ນຊາງ, ປະທານປະເທດແຫ່ງ ສສ ຫວຽດນາມ ໄດ້ໃຫ້ກຽດຕ້ອນຮັບການ ເຂົ້າຢ້ຽມຄຳນັບຂອງທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະ ເດີນທາງມາຢ້ຽມຢາມ ແລະ ເຮັດວຽກຢູ່ ສສ ຫວຽດນາມ.
ໃນໂອກາດດັ່ງກ່າວ, ທ່ານ ສົມສະຫວາດ ເລັ່ງສະຫວັດ ກ່າວວ່າ: ພັກ-ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ຕໍ່ການຊ່ວຍເຫລືອຂອງຫວຽດນາມ ທີ່ນັບມື້ເພິ່ມຂຶ້ນ ເຖິງວ່າສະຖານະການໂລກ ແລະ ຂົງເຂດ ປະສົບບັນຫາຫຍຸ້ງຍາກສັບສົນ. ພ້ອມນີ້, ທັງສອງຝ່າຍຈະຕ້ອງສືບຕໍ່ແລກປ່ຽນກົນໄກການປະສານງານ ເພື່ອສ້າງເງື່ອນໄຂໃຫ້ບັນດາກະຊວງ, ຂະແໜງການ, ບັນດາແຂວງຂອງລາວ-ຫວຽດນາມ ເພີ່ມທະວີການຮ່ວມມື ໃຫ້ນັບມື້ແໜ້ນແຟ້ນຍິ່ງໆຂຶ້ນ.
ປະທານປະເທດ ເຈືອງເຕິ້ນຊາງ ໄດ້ສະແດງຄວາມຊົມເຊີຍທີ່ຮອງນາຍົກລັດຖະມົນຕີທັງສອງ ໄດ້ປະສານສົມທົບກັນ ໃນການກວດກາການປະສານງານ ລະຫວ່າງ ສອງຝ່າຍ, ພິເສດ ແມ່ນໃນດ້ານການລົງທຶນ ແລະ ຕີລາຄາສູງຕໍ່ການພັດທະນາທາງດ້ານເສດຖະກິດ-ສັງຄົມ ຂອງສປປ ລາວ ໃນໄລຍະຜ່ານມາ ແລະ ອວຍພອນ ໃຫ້ຄວາມສຳພັນ ແບບພິເສດ ລາວ-ຫວຽດນາມ ນັບມື້ຈະເລີນງອກງາມ ແລະ ແໜ້ນແຟ້ນຍິ່ງໆຂຶ້ນ.
