ນັກວິເຄາະອຸດສາຫະກຳນໍ້າມັນປາມຄາດວ່າ ປະກົດການແອລນີໂຢ ຈະເຮັດໃຫ້ມາເລເຊຍຊຶ່ງເປັນຜູ້ຜະລິດ ນ້ຳມັນປາມອັນດັບສອງຂອງໂລກມີຜົນຜະລິດຫຼຸດລົງເຖິງ 2 ລ້ານໂຕນໃນປີນີ້ ແລະອາດເຮັດໃຫ້ລາຄານ້ຳມັນປາມປັບຕົວເພີ່ມຂຶ້ນອີກ.
ສຳນັກຂ່າວຕ່າງປະເທດລາຍງານວ່າ ທ່ານ ໂດຮັບ ມິສະທີ ຜູ້ບໍລິຫານບໍລິສັດສິນຄ້າອຸປະໂພກບໍລິໂພກຂອງອິນເດຍປະຈໍາຢູ່ສິງກະໂປກ່າວຕໍ່ກອງປະຊຸມໃນວັນທີ 28 ມີນາ ວ່າດ້ວຍນໍ້າມັນແລະພືດນໍ້າມັນສາກົນຄັ້ງທີ 13 ຢູ່ນະຄອນຫຼວງປັກກິ່ງຂອງສປ ຈີນວ່າ ແອລນິໂຢໜ້າຈະເຮັດໃຫ້ງົບປະມານສິ້ນສຸດເດືອນກັນຍາປີນີ້ ຜົນຜະລິດນໍ້າມັນປາມຂອງມາເລເຊຍຫຼຸດລົງເຖິງ 2 ລ້ານໂຕນຈາກປີງົບປະມານກ່ອນ ຖືວ່າຫຼຸດລົງຫຼາຍທີ່ສຸດໃນຮອບ 7 ປີ ແລະ ອາດເຮັດໃຫ້ດັດຊະນີລາຄານໍ້າມັນປາມປັບເພີ່ມຂຶ້ນ ຫຼັງຈາກຂຶ້ນໄປ 5% ໃນໄລຍະ 2 ອາທິດທີ່ຜ່ານມາ ສ້າງສະຖິສູງສຸດໃນຮອບ 2 ປີຢູ່ທີ່ໂຕນລະ 2.726 ຣິງກິດ (ສະກຸນເງິນມາເລເຊຍ) ໃນທ້າຍອາທິດທີ່ຜ່ານມາ ໂດຍຄາດວ່າຈະເພີ່ມຂຶ້ນເຖິງໂຕນລະ 3 ພັນຣິງກິດໃນໄວໆນີ້, ກ່ອນໜ້ານີ້ຄາດວ່າ ແອລນິໂຢຈະເຮັດໃຫ້ຜົນຜະລິດນ້ຳມັນປາມຂອງມາເລເຊຍໃນງົບປະມານນີ້ຫຼຸດລົງ 1,5 ລ້ານໂຕນ ເຫຼືອ 18,4 ລ້ານໂຕນ.
ທາງດ້ານຜົນຜະລິດນ້ຳມັນປາມຂອງອິນໂດເນເຊຍ ຜູ້ຜະລິດນ້ຳມັນປາມອັນດັບ 1 ຂອງໂລກ ຄາດວ່າ ປີນີ້ຈະຫຼຸດລົງ 1,2 ລ້ານໂຕນ ຕາມທີ່ຄາດຄະເນໄວ້ກ່ອນໜ້ານີ້ ສະເພາະເດືອນກຸມພາເດືອນດຽວຄາດວ່າຈະຫຼຸດລົງຈາກ 2,4 ລ້ານໂຕນ ໃນເດືອນມັງກອນເຫຼືອ 2,3 ລ້ານໂຕນຕໍ່າສຸດໃນຮອບ 1 ປີ ອັນເປັນຜົນມາຈາກພາວະແຫ້ງແລ້ງ ແລະ ໄຟປ່າ ດ້ານສະມາຄົມນ້ຳມັນປາມອິນໂດເນເຊຍຄາດວ່າ ຜົນຜະລິດປີນີ້ຈະເຫຼືອ 32,1 ລ້ານໂຕນ ຫຼຸດລົງເປັນເທື່ອທຳອິດນັບຕັ້ງແຕ່ປີ 1998.