ເພື່ອເປັນການປຶກສາຫາລືທາງດ້ານບັນຫາທີ່ຍັງຄົງຄ້າງ ແລະບັນດາເອກະສານຕ່າງໆທີ່ພົວພັນເຖິງວຽກງານສາຍການບິນໃນກອງປະຊຸມຄັ້ງທີ່ຜ່ານມາ, ລັດວິສາຫະກິດການບິນລາວຮ່ວມກັບກອງເລຂາອາຊຽນໄດ້ຈັດກອງປະຊຸມ ASEAN AIRLINES MEETING (28-29 AAM) ຂຶ້ນໃນວັນທີ 28 ມີນາຢູ່ໂຮງແຮມດອນຈັນ ໂດຍການເປັນປະທານຂອງທ່ານ ແສງປະເສີດ ມະທຸຈັນ ຮອງຜູ້ອຳນວຍການລັດວິສາຫະກິດການບິນລາວ, ພ້ອມດ້ວຍບັນດາຕົວແທນຈາກສາຍການບິນຂອງປະເທດອາຊຽນເຂົ້າຮ່ວມ.
ທ່ານ ແສງປະເສີດ ມະທຸຈັນ ກ່າວວ່າ: ກອງປະຊຸມຄັ້ງນີ້ແມ່ນເພື່ອປຶກສາຫາລືບາງບັນຫາທີ່ຍັງຄົງຄ້າງໃນກອງປະຊຸມທີ່ຜ່ານມາ ແລະບາງເອກະສານທີ່ຍັງຄ້າງຄາ ເປັນຕົ້ນແມ່ນເອກະສານທີ່ທາງລັດຖະບານຍັງບໍ່ທັນໄດ້ເຊັນຮັບຮອງ, ດັ່ງນັ້ນ ໃນກອງປະຊຸມຄັ້ງນີ້ ຈິ່ງໄດ້ເອົາເຂົ້າມາປຶກສານຳກັນວ່າໂຕໃດທີ່ໄດ້ແລ້ວ ແລະໂຕໃດທີ່ຍັງບໍ່ທັນໄດ້ຮັບການແກ້ໄຂ ຂະນະທີ່ພາກເຊົ້ານີ້ ກອງເລຂາອາຊຽນກໍໄດ້ແຈ້ງໃຫ້ຮູ້ ແລະອະທິບາຍໃຫ້ຟັງວ່າ ໃນຜ່ານມາວຽກທີ່ຍັງຄ້າງມີຫຍັງແດ່ ຊຶ່ງໃນນັ້ນກໍແມ່ນວຽກການອອກເອກະສານ ເພື່ອຂໍອະນຸຍາດບິນຜ່ານໄປຫາກັນຄວນຈະເຮັດແບບໃດ, ແລະບັນຫາທີສອງ ແມ່ນຈະເວົ້າເຖິງການຖືຮຸ້ນ, ການຮັບຮູ້ ໂດຍສະເພາະແມ່ນບັນດາປະເທດອາຊຽນນຳກັນຮັບຮູ້ ຫຼື ບໍ່ວ່າສາຍການບິນນີ້ ມີນັກລົງທຶນຕ່າງປະເທດເຂົ້າມາຮ່ວມທຶນ ໂດຍມີອັດຕາສ່ວນໃນການຖືຮຸ້ນຂອງນັກລົງທຶນທີ່ຫຼາຍກວ່າ ແລະປະເທດອື່ນເດຮັບຮູ້ ຫຼື ບໍ່.
ດັ່ງນັ້ນ ກອງປະຊຸມໃນມື້ນີ້ແມ່ນກອງປະຊຸມໜຶ່ງທີ່ກະກຽມເອກະສານ ເພື່ອນຳສະເໜີຕໍ່ກອງປະຊຸມ ATWG (Asean Air Transport Working Group) ທີ່ຈະຈັດຂຶ້ນໃນມື້ນີ້ ຊຶ່ງຈະເອົາຂໍ້ມູນຂອງສາຍການບິນນີ້ໄປປ້ອນໃຫ້ກອງປະຊຸມດັ່ງກ່າວ ເພື່ອຈະໃຫ້ກອງປະຊຸມລະດັບສູງຮັບຮູ້ເຖິງບັນຫາຕ່າງໆທີ່ຍັງຄ້າງຢູ່ສາຍການບິນວ່າມີຫຍັງແດ່.
ທີ່ມາ: