ຂປລ. ສະຖານເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ຮ່ວມກັບ ກະຊວງສຶກສາທິການ ແລະ ກິລາ ໄດ້ຈັດການແຂ່ງຂັນ ເວົ້າພາສາຍີ່ປຸ່ນ ຄັ້ງທີ 13 ຂຶ້ນ ໃນວັນທີ 27 ມີນາ ນີ້ ທີ່ສູນກິລາບູໂດ ລາວ-ຍີ່ປຸ່ນ ເຂົ້າຮ່ວມໂດຍທ່ານ ປອນເມກ ດາລາລອຍ, ປະທານສະມາຄົມ ມິດຕະພາບ ລາວ-ຍີ່ປຸ່ນ, ທ່ານ ດຣ.ສົມພູ ດວງສະຫວັນ ປະທານຄະ ນະ ລັດຖະສະພາ ມິດຕະພາບ ລາວ-ຍີ່ປຸ່ນ ແລະ ທ່ານ ທາເຄຊິ ຮິກິຮາຮະ, ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ພ້ອມດ້ວຍຄູ-ອາຈານ, ນ້ອງນັກຮຽນ, ນັກສຶກສາ ແລະ ຜູ້ເຂົ້າຊົມຢ່າງຄຶກຄື້ນ.
ການ ແຂ່ງຂັນດັ່ງກ່າວ, ຈັດຂຶ້ນເພື່ອເປັນການສົ່ງເສີມ ຄວາມສາມາດດ້ານ ພາສາຍີ່ປຸ່ນ ໃນ ສປປ ລາວ, ທັງເປັນການສ້າງ ຄວາມເຂົ້າໃຈເຊິ່ງກັນ ແລະ ກັນ ລະຫວ່າງ ປະຊາຊົນສອງຊາດ ລາວ-ຍີ່ປຸ່ນ ໃຫ້ແໜ້ນແຟ້ນຍິ່ງຂຶ້ນ. ເຊິ່ງການແຂ່ງຂັນດັ່ງກ່າວ ໄດ້ຈັດຂຶ້ນທຸກໆປີ ນັບແຕ່ປີ 2004 ເປັນຕົ້ນມາ.
ສຳລັບ ການແຂ່ງຂັນໃນປີນີ້ ມີໄວໜຸ່ມສົນໃຈ ເຂົ້າຮ່ວມແຂ່ງຂັນທັງໝົດ 72 ຄົນ ທີ່ມາຈາກແຂວງຕ່າງໆເຊັ່ນ: ແຂວງຫລວງພະບາງ, ບໍລິຄຳໄຊ, ສະຫວັນນະເຂດ, ຈຳປາສັກ ແລະ ນະຄອນຫລວງວຽງຈັນ, ເຊິ່ງຜູ້ເຂົ້າແຂ່ງຂັນໄດ້ສະແດງຄວາມສາມາດ ດ້ານພາສາຍີ່ປຸ່ນ ໂດຍການເລົ່າບົດທ່ອງ ເປັນພາສາຍີ່ປຸ່ນ ແລະ ບົດທີ່ຜູ້ເຂົ້າແຂ່ງຂັນ ໄດ້ກະກຽມມາ. ສຳລັບຜູ້ທີ່ຊະນະເລີດແມ່ນ ຈະໄດ້ມີໂອກາດເດີນທາງ ໄປທັດສະນະສຶກສາ ຢູ່ປະເທດຍີ່ປຸ່ນ, ໃນງານຍັງມີການຮ້ອງເພງ, ການເຕັ້ນ ແລະ ການສະແດງລະຄອນສັ້ນ ຈາກບັນດານ້ອງນັກຮຽນ.
ແຫລ່ງຂ່າວ:
