ຂປລ. ກອງປະຊຸມພົບປະມິດຕະພາບ ຊາວໜຸ່ມແຮກສ່ຽວ 5 ແຂວງພາກກາງ 6 ກະຊວງ ຄັ້ງທີ VI ຈັດຂຶ້ນໃນວັນທີ 28 ມີນາ ນີ້ ທີ່ຫໍວັດທະນະທຳແຫ່ງຊາດ ໂດຍການເປັນເຈົ້າພາບຮ່ວມ ລະຫວ່າງ ກະຊວງປ້ອງກັນຄວາມສະຫງົບ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ກະຊວງແຜນການ ແລະ ການລົງທຶນ ໂດຍທີ ທ່ານນາງ ວິໄລວອນ ພັນທະວົງ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນປະຕິວັດລາວ ແລະ ສະ ມາຊິກຊາວໜຸມເຂົ້າຮ່ວມ.
ກອງປະຊຸມໄດ້ຕີລາຄືນ ການພົວພັນຮ່ວມມືຕະຫລອດ ໄລຍະ 3 ປີ ຜ່ານມາ ຂອງຊາວໜຸ່ມແຮກສ່ຽວ 5 ແຂວງພາກກາງ ຄື: ນະຄອນຫລວງ, ແຂວງວຽງຈັນ, ບໍລິຄຳໄຊ, ຄຳມວນ, ສະຫວັນນະເຂດ ແລະ 6 ກະຊວງ ຄື: ກອງຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ , ກະຊວງແຜນການ ແລະ ການລົງທຶນ, ກະຊວງສຶກສາທິການ ແລະ ກິລາ ແລະ ທະນາຄານແຫ່ງ ສປປ ລາວ ວ່າໄດ້ມີການພົວພັນຮ່ວມມື ໄປມາຫາສູ່ຢ້ຽມຢາມເຊິ່ງກັນ ແລະ ກັນ ໃນເວລາທີ່ພົບກັບຄວາມຫຍຸ້ງຍາກ ເປັນຕົ້ນແມ່ນບັນຫາ ໄພພິບັດທາງທຳມະຊາດ ທີ່ສ້າງຄວາມເສຍຫາຍແກ່ແຂວງຕ່າງໆ ກໍໄດ້ມີການລະດົມຂົນຂວາຍວັດຖຸສິ່ງຂອງຈຳນວນ ໜຶ່ງໄປຊ່ວຍບັນເທົາທຸກ ນອກຈາກນັ້ນ ຍັງ ໄດ້ແລກປ່ຽນຖອດຖອນບົດຮຽນເຊິ່ງກັນ ແລະ ກັນ ໃນວຽກງານຊີ້ນຳນຳພາຊາວໜຸ່ມ-ເຍົາວະຊົນ ໃຫ້ມີຂະບວນການຄຶກຄື້ນ, ເຂັ້ມແຂງປະກອບສ່ວນເຂົ້າໃນການປົກປັກຮັກສາ ແລະ ສ້າງ ສາພັດທະນາປະເທດຊາດ, ນອກຈາກນັ້ນ, ຍັງໄດ້ເຮັດກິດຈະກຳຮ່ວມກັນເປັນຕົ້ນ: ແຂ່ງຂັນກິລາມິດຕະພາບ, ສະແດງສີລະປະວັນນະຄະດີ, ການສາຍຮູບເງົາ, ການຈັດກິດຈະກຳຖາມ-ຕອບ ຄວາມຮູ້ ແລະ ອື່ນໆ ອັນໄດ້ເຮັດໃຫ້ບັນດາ ຊາວໜຸ່ມ-ເຍົາວະຊົນ ຂອງບັນດາແຂວງ ແລະ ກະຊວງແຮກສ່ຽວ ຮູ້ຈັກຮັກແພງກັນກວ້າງແຂວງຫລາຍຂຶ້ນ.
ໃນຕໍ່ໜ້າຈະສືບຕໍ່ປັບປຸງ ຄະນະຊາວນະຊາວໜຸ່ມໃຫ້ມີຄວາມເຂັ້ມແຂງ ຕັ້ງໜ້າປະຕິບັດໜ້າທີ່ວຽກງານ ຕາມແນວທາງການປ່ຽນແປງໃໝ່ຂອງພັກ ຄະນະຊາວໜຸ່ມ ຈະ ຕ້ອງໄດ້ອອກແຮງງານ ສຶກສາອົບຮົມການເມືອງ-ແນວຄິດ, ວິທີການເຮັດວຽກໃຫ້ດີຂຶ້ນ, ເຕົ້າໂຮມຄວາມສາມັກຄີ ປຸກລະດົມຊີ້ນຳ-ນຳພາ ສະມາຊິກຊາວໜຸ່ມ ຕັ້ງໜ້າສ້າງຜົນງານ ແລະ ພັດທະນາວຽກງານຊາວໜຸ່ມຢ່າງບໍ່ຢຸດຍັ້ງ.
ແຫລ່ງຂ່າວ:
