ວັນທີ 25 ມີນາທີ່ຜ່ານມານີ້, ທີ່ສຳນັກງານຜູ້ຕາງໜ້າ ສະຫະພາບເອີລົບ ປະຈຳລາວ,ໄດ້ຈັດພິທີລົງນາມປຶ້ມໄຫວ້ອາໄລ ຕໍ່ຜູ້ຖືກເຄາະຮ້າຍຈາກການວາງລະເບີດສະຫລະຊີບ ຢູ່ນະຄອນຫລວງບຣຸກແຊນ ປະເທດແບນຊິກ, ໂດຍທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ ເປັນຜູ້ລົງນາມ, ໂດຍມີເນື້ອໃນວ່າ: “ພວກຂ້າພະເຈົ້າ ໄດ້ຮັບຊາບຂ່າວດ້ວຍຄວາມເສົ້າໂສກ ກ່ຽວກັບເຫດການສະຫຍອງຂວັນ ທີ່ເກີດຂຶ້ນຈາກການກະທຳທີ່ໂຫດຮ້າຍປ່າເຖື່ອນ ຕໍ່ກັບເຫດການວາງລະ ເບີດ ໂດຍກຸ່ມກໍ່ການຮ້າຍ ຢູ່ສະໜາມບິນສາກົນ Zaventem ແລະ ສະຖານນີລົດໄຟໃຕ້ດິນ Mael beek ທີ່ນະຄອນຫລວງ ບຣຸກແຊນ ປະເທດແບນຊິກ, ໃນວັນທີ 22 ມີນາ2016, ຊຶ່ງເຮັດໃຫ້ມີຜູ້ປະສົບເຄາະຮ້າຍ ແລະ ຖືກບາດເຈັບເປັນຈຳນວນຫລາຍ. ດັ່ງນັ້ນ ໃນນາມລັດຖະບານ ແລະ ປະຊາ ຊົນ ແຫ່ງ ສປປ ລາວ, ຂ້າພະເຈົ້າ ຂໍສະແດງຄວາມເສົ້າສະຫລົດໃຈ ແລະ ສະແດງຄວາມເຫັນໃຈຢ່າງສຸດຊຶ້ງ ມາຍັງລັດຖະບານ ແລະ ປະຊາຊົນ ແຫ່ງ ຣາຊະອານາຈັກ ແບນຊິກ ກໍຄືຕໍ່ຄອບຄົວຂອງຜູ້ທີ່ໄດ້ຮັບເຄາະຮ້າຍຈາກການກະທຳອັນຮ້າຍແຮງດັ່ງກ່າວ”.
ແຫລ່ງຂ່າວຈາກ: ໜັງສືພິມລາວພັດທະນາ