ສູນກາງສະຫະພັນແມ່ຍິງລາວ ຮ່ວມກັບ ບໍລິສັດຢູນີລີເວີລາວຈໍາກັດ ຈັດພິທີຍ່າງເພື່ອສຸຂະພາບຂອງຄອບຄົວ ຄັ້ງທີ I ຂຶ້ນໃນຕອນເຊົ້າວັນທີ 26 ມີນາ 2016 ເຊິ່ງເລີ່ມແຕ່ປະຕູໄຊ ຫາ ຫໍຄໍາ ແລ້ວກັບຄືນສູ່ປະຕູໄຊ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ດຣ.ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ຮອງປະທານສະພາແຫ່ງຊາດ ທ່ານ ດຣ.ນາງ ອິນລາວັນ ແກ້ວບຸນພັນ ກໍາມະການສູນກາງພັກ ປະທານສູນກາງສະຫະພັນແມ່ຍິງລາວ ມີການນໍາພັກ-ລັດ ອົງການແນວລາວສ້າງຊາດ ອົງການຈັດຕັ້ງມະຫາຊົນ ບັນດາຜູ້ແທນສະມາຊິກສະພາແຫ່ງຊາດ ຊຸດທີ VIII ສະມາຊິກສະພາແຫ່ງຊາດເພດຍິງ ສູນກາງສະຫະພັນແມ່ຍິງລາວ ຄະນະສະຫະພັນແມ່ຍິງບັນດາກະຊວງ ອົງການຈັດຕັ້ງຂັ້ນສູນກາງ ນະຄອນຫຼວງວຽງຈັນ ບັນດາສະຫະພັນແມ່ຍິງບ້ານອ້ອມຂ້າງ ແລະ ມວນຊົນຊາວນະຄອນຫຼວງວຽງຈັນເຂົ້າຮ່ວມຫຼາຍກວ່າ 2.000 ຄົນ.

ທ່ານ ດຣ.ນາງ ອິນລາວັນ ແກ້ວບຸນພັນ ໄດ້ໃຫ້ຮູ້ວ່າ ກິດຈະກໍາຍ່າງເພື່ອສຸຂະພາບຂອງຄອບຄົວຄັ້ງນີ້ ຈັດຂຶ້ນເປັນຄັ້ງທໍາອິດໃນ ສປປ.ລາວ ເພື່ອເປັນການຈັດຕັ້ງຜັນຂະຫຽາຍ ມະຕິກອງປະຊຸມໃຫຽ່ຜູ້ແທນແມ່ຍິງທົ່ວປະເທດ ຄັ້ງທີ VII ແລະ ແຜນພັດທະນາແມ່ຍິງລາວ ຮວມມີ 34 ໂຄງການ ເຂົ້າສູ່ຊີວິດໂຕຈິງ ທັງເປັນການຈັດຕັ້ງປະຕິບັດກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ ໂດຍສະເພາະແມ່ນການພັດທະນາທາງດ້ານຮ່າງກາຍ ແລະ ຈິດໃຈ ເພື່ອພ້ອມກັບສະມາຊິກໃນຄອບຄົວສ້າງຕົນເອງ ແລະ ສັງຄົມໃຫ້ມີການພັດທະນາດີຂຶ້ນຢ່າງບໍ່ຢຸດຢັ້ງ ນອກນີ້ ຍັງເປັນການຜັນຂະຫຽາຍເນື້ອໃນຂໍ້ແຂ່ງຂັນ 3 ດີ ທີ່ສ້າງເງື່ອນໄຂໃຫ້ສະມາຊິກຄອບຄົວໄດ້ຢູ່ຮ່ວມກັນ ເຮັດກິດຈະກໍາຮ່ວມກັນ ແລະ ພ້ອມກັນເບີກບານມ່ວນຊື່ນ ສ້າງຄອບຄົວໃຫ້ມີຄວາມອົບອຸ່ນ ມີຄວາມຖືກຕ້ອງປອງດອງ ແລະ ມີຄວາມສາມັກຄີຮັກແພງກັນ ທັງນີ້ ເນື່ອງຈາກຄອບຄົວ ແມ່ນຈຸລັງຂອງສັງຄົມ ແລະ ຄອບຄົວມີບົດບາດສໍາຄັນ ເປັນກໍາລັງແຮງຕໍ່ການພັດທະນາສັງຄົມ ປະເທດຊາດ ຖ້າຄອບຄົວມີວາມສະຫງົບ ສັງຄົມກໍມີຄວາມສະຫງົບ ເປັນລະບຽບຮຽບຮ້ອຍ ແລະ ມີຄວາມໝັ້ນຄົງ ສໍາລັບໃນຊຸມປີຕໍ່ໜ້າ ສູນກາງສະຫະພັນແມ່ຍິງລາວ ກໍຈະສືບຕໍ່ຮ່ວມມືກັບບັນດາອົງການຈັດຕັ້ງທາງພາກລັດ ແລະ ເອກະຊົນເພື່ອຈັດກິດຈະກໍາແບບນີ້ຂຶ້ນໃນທຸກໆປີ.