ໃນຕອນບ່າຍຂອງວັນທີ 23 ມີນາ 2016 ຜ່ານມາ ຢູ່ທີ່ສະໂມສອນຂອງໂຮງຮຽນເຕັກນິກວິຊາຊີບແບບປະສົມແຂວງຊຽງຂວາງ ໄດ້ຈັດພິທີສະຫຼຸບຜົນງານການເຂົ້າຮ່ວມແຂ່ງຂັນສີມື 8 ແຂວງພາກເໜືອ ຄັ້ງທີ III ທີ່ແຂວງຜົ້ງສາລີເປັນເຈົ້າພາບ ໃຫ້ກຽດເຂົ້າຮ່ວມພິທີຄັ້ງນີ້ມີທ່ານ ທອງເພັດ ອິນທະໄຊ ຮອງຫົວໜ້າພະແນກສຶກສາທິການ ແລະ ກີລາແຂວງຊຽງຂວາງ ທ່ານ ທອງສະຫວັນ ວິຣະຈິດ ຮອງອຳນວຍການໂຮງຮຽນເຕັກນິກວິຊາຊີບແບບປະສົມແຂວງ ພ້ອມຄະນະ ມີຕາງໜ້າໂຮງຮຽນອ້ອມຂ້າງເທສະບານແຂວງທີ່ຂຶ້ນກັບພະແນກ ຄູອາຈານສອນພາຍໃນໂຮງຮຽນ ນ້ອງນັກຮຽນ ແລະ ແຂກທີ່ຖືກເຊີນເຂົ້າຮ່ວມ.

ໂອກາດນີ້ ທ່ານ ທອງສະຫວັນ ວິຣະຈິດ ຮອງອຳນວຍການໂຮງຮຽນເຕັກນິກວິຊາຊີບແບບປະສົມແຂວງຊຽງຂວາງ ໃນນາມຄູນຳພານັກຮຽນເຂົ້າຮ່ວມແຂ່ງຂັນໄດ້ກ່າວລາຍງານຕໍ່ພິທີວ່າ ຄັ້ງນີ້ເປັນຄັ້ງທີ III ທີ່ຈັດໃຫ້ມີການແຂ່ງຂັນສີມືຂອງບັນດານ້ອງໆນັກຮຽນ ໂຮງຮຽນເຕັກນິກວິຊາຊີບແບບປະສົມ 8 ແຂວງພາກເໜືອ ເຊິ່ງປະກອບມີ ຫົວພັນ ຊຽງຂວາງ ຫຼວງພະບາງ ຫຼວງນ້ຳທາ ບໍ່ແກ້ວ ອຸດົມໄຊ ໄຊຍະບູລີ ແລະ ຜົ້ງສາລີ ໂດຍແມ່ນແຂວງຜົ້ງສາລີເປັນເຈົ້າພາບ ແລະ ດຳເນີນການແຂ່ງຂັນສຳເລັດແຕ່ວັນທີ 15 ມີນາ 2016 ຜ່ານມາ ໃນນັ້ນ ແຂວງຊຽງຂວາງສົ່ງນັກຮຽນເຂົ້າຮ່ວມແຂ່ງຂັນມີທັງໝົດ 5 ນ້ອງ ຍິງ 1 ນ້ອງ ແລະ ມີ 5 ຫົວຂໍ້ທີ່ສົ່ງເຂົ້າແຂ່ງຂັນຄື ຕິດໂບໂຕະລາຍແມງກະເບື້ອ ການມ້າງ ແລະ ປະກອບກາຣບຸຍຣາເຕີກລົດຈັກ 4 ຈັງຫວະ ປະກອບວົງກົບປະຕູ ຕິດບົວຫົວເສົາ ການສຽບຂ້າງ ແລະ ການທາບ ຜົນການແຂ່ງຂັນປາກົດວ່າ ໂຮງຮຽນເຕັກນິກວິຊາຊີບແບບປະສົມແຂວງຊຽງຂວາງ ສາມາດກວາດລາງວັນທີ 1 ໄດ້ທັງ 2 ຫົວຂໍ້ແຂ່ງຂັນຄື ມ້າງ ແລະ ປະກອບກາຣບຸຍຣາເຕີກລົດຈັກ 4 ຈັງຫວະ ໂດຍແມ່ນ ທ້າວ ຕຸ້ຍ ຜາຍອຸດອນ ແລະ ຫົວຂໍ້ ປະກອບວົງກົບປະຕູ ແມ່ນທ້າວ ທອງສະຫວັດ ວັນທະລີ ໃນນັ້ນ ລາງວັນທີ 2 ໄດ້ 1 ລາງວັນຄື ຫົວຂໍ້ຕິດໂບໂຕະລາຍແມງກະເບື້ອ ໂດຍແມ່ນ ນ. ໄມລໍ່ ເມື່ອທຽບໃສ່ເປົ້າໝາຍໃນເບື້ອງຕົ້ນທີ່ກຳນົດໄວ້ ເຫັນວ່າປະສົບຜົນສຳເລັດເກີນຄາດ ເພາະແຂວງຊຽງຂວາງ ຖືກຈັດຢູ່ອັນດັບທີ 2 ຂອງບັນດາແຂວງທີ່ເຂົ້າຮ່ວມແຂ່ງຂັນຄັ້ງນີ້ ຖັດຈາກແຂວງອຸດົມໄຊ ຈາກນັ້ນ ພິທີກໍໄດ້ມອບໃບຍ້ອງຍໍ ແລະ ຂອງຂວັນລາງວັນຈຳນວນນຶ່ງໃຫ້ແກ່ຜູ້ຊະນະເລີດ ເພື່ອເປັນການຊົມເຊີຍ ແລະ ໃຫ້ກຳລັງໃຈແກ່ນ້ອງໆທີ່ເຂົ້າຮ່ວມແຂ່ງຂັນຄັ້ງນີ້.

ແຫລ່ງຂ່າວຈາກ: ວິທະຍຸ-ໂທລະພາບນະຄອນຫຼວງ