ໃນຕອນເຊົ້າຂອງວັນທີ 24 ມີນາ 2016 ທີ່ເມືອງໂບອາວ ແຂວງຮ່າຍນານ ສປ.ຈີນ ໄດ້ຈັດກອງປະຊຸມປຶກສາຫາລື ໂບອາວ ເພື່ອອາຊີ ພາຍໃຕ້ຫົວຂໍ້ ອະນາຄົດໃໝ່ຂອງອາຊີ ຄວາມຫຼາກຫຼາຍ ແລະ ວິໄສທັດໃໝ່ ໂດຍການໃຫ້ກຽດເປັນປະທານຂອງ ທ່ານ ຫຼີ່ ເຄີ້ສຽງ ນາຍົກລັດຖະມົນຕີ ແຫ່ງ ສປ.ຈີນ ມີບັນດາຜູ້ນໍາຂອງທະວີບອາຊີ ຮວມທັງໝົດ 11 ປະເທດ ແລະ ບັນດານັກທຸລະກິດ ນັກລົງທຶນ ນັກຄົ້ນຄວ້າ ທີ່ມີຊື່ສຽງໃນອາຊີ ແລະ ທະວີ ອື່ນໆຈໍານວນທັງໝົດກວ່າ 2.000 ຄົນ ຄະນະຜູ້ແທນ ສປປ.ລາວ ແມ່ນນໍາໂດຍ ທ່ານ ທອງສິງ ທໍາມະວົງ ນາຍົກລັດຖະມົນຕີ ພ້ອມດ້ວຍຄະນະອີກ 12 ທ່ານ ເຂົ້າຮ່ວມກອງປະຊຸມ.
ໃນກອງປະຊຸມປຶກສາຫາລືຄັ້ງນີ້ ແມ່ນເປັນເວທີນຶ່ງທີ່ເບິ່ງໄປຂ້າງໜ້າ ໂດຍມີຈຸດປະສົງ ເພື່ອຂັບເຄື່ອນກົນໄກການຮ່ວມມືທີ່ມີປະສິດທິຜົນໃນພາກພື້ນອາຊີ ເຊິ່ງຈະນໍາຜົນປະໂຫຽດໂຕຈິງມາສູ່ປະຊາຊົນໃນປະເທດສະມາຊິກກໍຄື ປະເທດຕ່າງໆໃນອາຊີ ເປັນຕົ້ນແມ່ນຂົງເຂດການເມືອງ-ຄວາມໝັ້ນຄົງ ການຮ່ວມມືທາງດ້ານເສດຖະກິດ ການພັດທະນາແບບຍືນຍົງ ແລະ ການພົວພັນ ລະຫວ່າງ ປະຊາຊົນດ້ວຍກັນ ເຊິ່ງກົນໄກການຮ່ວມມືດັ່ງກ່າວ ຈະເຮັດໃຫ້ພວກເຮົາສາມາດສ້າງຄວາມເຊື່ອໝັ້ນເຊິ່ງກັນແລະກັນ ຊ່ອຍເຫຼືອເຊິ່ງກັນແລະກັນ ແລະ ເຫັນອົກເຫັນໃຈກັນຫຼາຍຂຶ້ນ ຄຽງຄູ່ກັນນັ້ນ ກໍເພື່ອຕ້ອງການສ້າງຂົງເຂດອາຊີໃຫ້ມີສັນຕິພາບ ມີປະຊາທິປະໄຕ ແລະ ມີຄວາມປອດໄພພາຍໃນພາກພື້ນນັ້ນເອງ.
ໃນໂອກາດນີ້ ທ່ານ ທອງສິງ ທໍາມະວົງ ນາຍົກລັດຖະມົນຕີ ແຫ່ງ ສປປ.ລາວ ກໍໄດ້ຊົມເຊີຍລັດຖະບານ ສປ.ຈີນ ທີ່ໄດ້ຕົກລົງປ່ອຍນໍ້າຈາກເຂື່ອນຂອງຈີນ ເພື່ອຫຼຸດຜ່ອນຜົນກະທົບຂອງໄພແຫ້ງແລ້ງຂອງປະເທດຢູ່ລຸ່ມແມ່ນໍ້າຂອງ ພ້ອມດຽວກັນນີ້ ຍັງໄດ້ຢໍ້າເຖິງການຕົກລົງປ່ອຍນໍ້າ 1.100 ແມັດກ້ອນ ຕໍ່ວິນາທີ ຈາກບັນດາເຂື່ອນຕ່າງໆ ຢູ່ຕາມສາຂາຂອງແມ່ນໍ້າຂອງໃນ ສປປ.ລາວ ເພື່ອແນໃສ່ແກ້ໄຂບັນຫາໄພແຫ້ງແລ້ງທີ່ບັນດາປະເທດໃນອ່າງແມ່ນໍ້າຂອງພວມຜະເຊີນຢູ່ໃນປັດຈຸບັນ.
ປີນີ້ ໃນຖານະທີ່ ສປປ.ລາວ ເປັນປະທານອາຊຽນ ທ່ານນາຍົກລັດຖະມັນຕີ ໄດ້ແຈ້ງຕໍ່ທີ່ປະຊຸມວ່າ ສປປ.ລາວ ໄດ້ຖືບູລິມະສິດໃນການຮ່ວມມືກັບທຸກປະເທດສະມາຊິກອາຊຽນ ປະກອບສ່ວນເຂົ້າໃນການປັບປຸງປະຊາຄົມອາຊຽນ ໃຫ້ນັບມື້ນັບເຂັ້ມແຂງ ແລະ ຈະຮ່ວມມືກັບບັນດາປະເທດຄູ່ຮ່ວມຂອງອາຊຽນ ບົນພື້ນຖານ 8 ບູລິມະສິດ ທີ່ ສປປ.ລາວ ກໍານົດໄວ້ ນອກນັ້ນ ທ່ານນາຍົກລັດຖະມັນຕີ ຍັງໄດ້ຊີ້ແຈງວ່າ ລັດຖະບານ ສປປ.ລາວ ພວມມີຄວາມພະຍາຍາມເປີດກວ້າງ ແລະ ດຳເນີນການເຊື່ອມໂຍງ ແລະ ເຊື່ອມຈອດ ກັບບັນດາປະເທດເພື່ອນບ້ານຢ່າງຕັ້ງໜ້າ ໂດຍໄດ້ລົງທຶນປັບປຸງເສັ້ນທາງເຊື່ອມຕໍ່ກັບປະເທດໃກ້ຄຽງ ເພື່ອຈະເຮັດໃຫ້ປະເທດ ສາມາດກາຍເປັນປະເທດທາງຜ່ານ ໃນການເຊື່ອມຕໍ່ກັບປະເທດຕ່າງໆ ເຊິ່ງຈະອຳນວຍຄວາມສະດວກໃຫ້ແກ່ການແລກປ່ຽນ ການຈໍລະຈອນສິນຄ້າ ການໂທລະຄົມມະນາຄົມ ກໍຄືການໄປມາຫາສູ່ກັນ ລະຫວ່າງປະຊາຊົນພາຍໃນຂົງເຂດໃຫ້ນັບມື້ນັບຫຼາຍຂຶ້ນ.
ແຫລ່ງຂ່າວຈາກ: ວິທະຍຸ – ໂທລະພາບນະຄອນຫຼວງ
