ສຳນັກຂ່າວຕ່າງປະເທດ ລາຍງານໃນວັນທີ 25 ມີນານີ້ວ່າ ບົດລາຍງານການວິເຄາະຂອງຝຣັ່ງ ຊຶ່ງຖືກເຜີຍແຜ່ເມື່ອວັນທີ 23 ມີນາ 2016 ກ່ຽວກັບ ດັດສະນີຄວາມສ່ຽງໄພທຳມະຊາດ ທີ່ອ່ອນໄຫວຕໍ່ອັນຕະລາຍ ໄດ້ລະບຸວ່າ ເມືອງໃຫຍ່ໆທົ່ວທະວີບອາຊີຈຳນວນຫລາຍ ມີຄວາມສ່ຽງຕໍ່ການເກີດໄພທຳມະຊາດຮຸນແຮງ ຫລາຍທີ່ສຸດໃນໂລກ ໃນຂະນະທີ່ທະວີບອາຟຣິກາ ມີຜູ້ຄົນສ່ຽງໄດ້ຮັບຜົນກະທົບ ຈາກໄພທຳມະຊາດຫລາຍທີ່ສຸດ.

ບົດລາຍງານດັ່ງກ່າວໄດ້ລະບຸວ່າ ປະຊາກອນໃນອາຊີໃຕ້ ເກືອບ 1,400 ລ້ານຄົນ ໂດຍສະເພາະໃນອິນເດຍ, ບັງກະລາເດດ ແລະ ປາກີສະຖານ ມີຄວາມສ່ຽງຖືກໄພທຳມະຊາດຮຸນແຮງໂຈມຕີ ຢ່າງໜ້ອຍ 1 ຄັ້ງເຊັ່ນ ພາຍຸຮຸນແຮງພັດຖະຫລົ່ມ ແລະ ແຜ່ນດິນໄຫວ ຫລື ປະເຊີນກັບສະຖານະການທີ່ກ່ຽວຂ້ອງກັບ ສະພາວະລະດັບນ້ຳທະເລສູງຂຶ້ນ ໂດຍອັດຕາຄວາມສ່ຽງປະເຊີນໄພທຳມະຊາດ ຂອງຊາວບັງກະລາເດດ ສູງເຖິງ 100%, ອິນເດຍ 82%, ປາກີສະຖານ 70% ໃນຂະນະທີ່ຈີນ, ອິນໂດເນເຊຍ, ຍີ່ປຸ່ນ ແລະ ຟິລິບປິນ ຢູ່ໃນກຸ່ມປະເທດ ທີ່ມີປະຊາກອນສ່ຽງປະເຊີນກັບໄພທຳມະຊາດຮຸນແຮງ ເຊັ່ນດຽວກັນ.