ໃນວັນທີ 23 ມີນາ 2016 ພະແນກສຶກສາທິການ ແລະ ກີລາແຂວງຈຳປາສັກ ໄດ້ຈັດການສອບເສັງຄັດເລືອກນັກຮຽນເກັ່ງຊັ້ນ ປ.5 ມ.4 ແລະ ມ.7 ທົ່ວແຂວງ ເຊິ່ງຈັດຂຶ້ນຢູ່ທີ່ໂຮງຮຽນມັດທະຍົມສົມບູນປາກເຊ ເມືອງປາກເຊ ແຂວງຈຳປາສັກ ໂດຍການເປັນກຽດເຂົ້າຮ່ວມຂອງທ່ານ ສີ ພັນທະວົງ ຮອງຫົວໜ້າພະແນກສຶກສາທິການ ແລະ ກີລາແຂວງຈຳປາສັກ ມີຜູ້ອຳນວຍການໂຮງຮຽນອ້ອມຂ້າງ ມີພະນັກງານ ຄູ-ອາຈານ ພໍ່ແມ່ນັກຮຽນເຂົ້າຮ່ວມ.
ການສອບເສັງຄັດເລືອກເອົາໂຕແທນນັກຮຽນເກັ່ງລະດັບແຂວງ ມີນັກຮຽນເກັ່ງທີ່ໄດ້ຜ່ານການຄັດເລືອກລະດັບເມືອງມາແລ້ວສະເພາະຊັ້ນປະຖົມ ໃນ 3 ວິຊາຄື ວິຊາໂລກອ້ອມໂຕ ວິຊາພາສາລາວ ແລະ ວິຊາຄະນິດສາດ ມີນັກສອບເສັງທັງໝົດ 60 ຄົນ ຊັ້ນມັດທະຍົມຕອນຕົ້ນ ແລະ ຕອນປາຍ ມີນັກສອບທັງໝົດ 212 ຄົນ ໃນນີ້ ມັດທະຍົມຕົ້ນ 80 ຄົນ ສອບເສັງໃນ 4 ວິຊາຄື ວິຊາພາສາລາວ-ວັນນະຄະດີ ວິຊາຄະນິດສາດ ວິຊາເຄມີສາດ ແລະ ວິຊາຟິຊິກສາດ ເຊິ່ງແຕ່ລະວິຊາແມ່ນຄັດເລືອກເອົາວິຊາລະ 1 ຄົນເທົ່ານັ້ນ ເພື່ອເຂົ້າຮ່ວມສອບເສັງລະດັບສູນກາງທີ່ນະຄອນຫຼວງວຽງຈັນ ເຊິ່ງຈະຈັດຂື້ນໃນຕໍ່ໜ້ານີ້.
ການສອບເສັງຄັ້ງນີ້ ແມ່ນການປະເມີນຜົນການຮຽນ-ການສອນ ຂອງ ຄູ-ອາຈານ ແລະ ນັກຮຽນໃນການສິດສອນຜ່ານມາ ນັກຮຽນມີຄວາມສາມາດເຂົ້າໃຈໜ້ອຍຫຼາຍພຽງໃດຕໍ່ການແກ້ໂຈດບັນຫາຕ່າງໆ ພ້ອມນັ້ນ ກໍເປັນການປັບປຸງວຽກງານການສຶກສາໃນທົ່ວແຂວງເວົ້າຮວມ ເວົ້າສະເພາະກໍແມ່ນໃນລະດັບເມືອງລົງຮອດພື້ນຖານບ່ອນໂຮງຮຽນຕັ້ງຢູ່ ຄູ-ອາຈານ ໄດ້ປະຕິບັດໜ້າທີ່ຂອງຕົນເຕັມເມັດເຕັມໜ່ວຍດີແລ້ວບໍ ຫຼື ຍັງມີສິ່ງໃດທີ່ຂາດຕົກບົກຜ່ອງ ເພື່ອແກ້ໄຂໃຫ້ດີຂຶ້ນໃນຕໍ່ໜ້າ ເຮັດໃຫ້ການສຶກສາ-ກີລາ ບັນລຸເປົ້າໝາຍທີ່ຂັ້ນເທິງວາງອອກ ໃຫ້ປາກົດຜົນເປັນຈິງ.
ສຳລັບນັກຮຽນທີ່ໄດ້ທີ 1-3 ທີ່ມີຄະແນນໃນແຕ່ລະວິຊາບໍ່ຕໍ່າກວ່າ 60 ຄະແນນ ທາງພະແນກສຶກສາທິການ ແລະ ກີລາແຂວງຈຳປາສັກ ຈະໄດ້ມີຂອງຂວັນລາງວັນທຶນການສຶກສາມອບໃຫ້ເປັນສິ່ງຈູງໃຈ ກະຕຸກຊຸກຍູ້ໃຫ້ລູກຫຼານຕັ້ງໃຈຮໍ່າຮຽນໃຫ້ເກັ່ງຂຶ້ນຫຼາຍກວ່າເກົ່າ ອັນດັບທີ 1 ແມ່ນໄດ້ຮັບເງິນ 3.000.000 ກີບ ອັນດັບທີ 2 ແມ່ນ 1.000.000 ກີບ ແລະ ອັນດັບທີ 3 ແມ່ນ 500.000 ກີບ.
ແຫລ່ງຂ່າວຈາກ: ວິທະຍຸ-ໂທລະພາບນະຄອນຫຼວງ