ສປປ.ລາວ ໄດ້ຮັບກຽດເປັນເຈົ້າພາບຈັດກອງປະຊຸມປະຈໍາປີ ເຄືອຂ່າຍສະຖາບັນປ້ອງກັນຊາດ ແລະ ຄວາມໝັ້ນຄົງອາຊຽນ ຄັ້ງທີ 9 ຫຼື 9th NADI ເຊິ່ງຈັດຂຶ້ນຢ່າງເປັນທາງການໃນ ວັນທີ 23 ມີນາ 2016 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໂດຍການເປັນປະທານຂອງທ່ານ ພັ.ອ ສຸລິວັນ ແສງຈັນ ຮອງຫົວໜ້າກົມວິທະຍາສາດ-ປະຫວັດສາດການທະຫານ ກະຊວງປ້ອງກັນປະເທດ ແຫ່ງ ສປປ.ລາວ ມີບັນດາຫົວໜ້າສະຖາບັນປ້ອງກັນຊາດ ແລະ ຄວາມໝັ້ນຄົງ ຈາກປະເທດສະມາຊິກອາຊຽນ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ທ່ານ ພັ.ອ ສຸລິວັນ ແສງຈັນ ໄດ້ກ່າວວ່າ ກອງປະຊຸມຄັ້ງນີ້ ແມ່ນມີຄວາມໝາຍສໍາຄັນຍິ່ງ ເຊິ່ງຈະໄດ້ລົງເລິກປຶກສາຫາລື ແລກປ່ຽນຄໍາຄິດຄໍາເຫັນເຊິ່ງກັນແລະກັນ ເພື່ອຮ່ວມກັນສົ່ງເສີມສັນຕິພາບ ສະຖຽນລະພາບ ແລະ ການພັດທະນາເພື່ອສິດຜົນປະໂຫຽດຮວມຂອງປະຊາຊົນອາຊຽນ ເຊິ່ງກອງປະຊຸມດັ່ງກ່າວ ຈັດຂຶ້ນຫຼັງຈາກການສ້າງຕັ້ງປະຊາຄົມອາຊຽນ ແລະ ເປັນຄັ້ງທໍາອິດທີ່ມີການຈັດຕັ້ງປະຕິບັດແຜນງານອາຊຽນ ໃນປີ 2025 ຮ່ວມກັນ ໂດຍສະເພາະ ແຜນແມ່ບົດດ້ານການເມືອງ ແລະ ຄວາມໝັ້ນຄົງ ແຜນແມ່ບົດຂອງປະຊາຄົມອາຊຽນ ໃນປີ 2025 ເຊິ່ງສະແດງໃຫ້ເຫັນວ່າ ປະຊາຊົນ ແລະ ສະມາຊິກລັດອາຊຽນ ສາມາດດໍາລົງຊີວິດຢູ່ຮ່ວມກັນໄດ້ໂດຍສັນຕິ ມີປະຊາທິປະໄຕ ແລະ ມີສະພາບແວດລ້ອມທີ່ດີ.
ກອງປະຊຸມດັ່ງກ່າວ ຈະໄດ້ດໍາເນິີນໄປເປັນເວລາ 4 ວັນຈິ່ງຈະໄດ້ອັດລົງ.
ແຫລ່ງຂ່າວຈາກ: ວິທະຍຸ-ໂທລະພາບນະຄອນຫຼວງ