ສຳນັກຂ່າວຕ່າງປະເທດ ລາຍງານໃນວັນທີ 24 ມີນານີ້ວ່າ ເກີດອຸບັດເຫດຢູ່ບໍ່ຖ່ານຫີນແຫ່ງໜຶ່ງ ຢູ່ແຂວງຊານຊີ ທາງພາກເໜືອຂອງປະເທດຈີນ ຊຶ່ງເປັນຂອງບໍລິສັດບໍ່ຖ່ານຫີນ ຊານຊີ ຕ້າຖົງ ກຣຸບ ໂດຍໃນຂະນະເກີດເຫດ ມີກຳມະກອນເຮັດວຽກຢູ່ເຖິງ 129 ຄົນ ແລະ ສາມາດຫລົບໜີອອກມາໄດ້ 110 ຄົນ ສ່ວນທີ່ເຫລືອຢ່າງໜ້ອຍ 19 ຄົນ ແມ່ນເສຍຊີວິດ ສ່ວນສາເຫດຂອງອຸບັດເຫດດັ່ງກ່າວ ຍັງຢູ່ລະຫວ່າງການສືບສວນຂອງເຈົ້າໜ້າທີ່.

ທັງນີ້ ຈີນຖືເປັນຜູ້ຜະລິດຖ່ານຫີນ ລາຍໃຫຍ່ທີ່ສຸດໃນໂລກ ຊຶ່ງມັກປະສົບກັບອຸບັດເຫດຮ້າຍແຮງ ກ່ຽວກັບອຸດສາຫະກຳບໍ່ແຮ່ເປັນປະຈຳ, ແນວໃດກໍຕາມ ຜ່ານການປັບປຸງມາດຖານ ກ່ຽວກັບຄວາມປອດໄພແຮງງານ ໄດ້ເຮັດໃຫ້ຈຳນວນກຳມະກອນທີ່ເສຍຊີວິດໃນແຕ່ລະປີ ຫລຸດລົງເປັນກ້າວໆ.