ສຳນັກຂ່າວຕ່າງປະເທດ ລາຍງານໃນວັນທີ 24 ມີນານີ້ວ່າ ທ່ານ ດາເຣນ ເຊສເຕີ ລັດຖະມົນຕີວ່າການ ກະຊວງຄົມມະນາຄົມອົດສະຕຣາລີ ໄດ້ກ່າວວ່າ ກໍລະນີທີ່ນັກທ່ອງທ່ຽວພົບຊາກຊິ້ນສ່ວນເຮືອບິນ 2 ອັນ ຢູ່ບໍລິເວນຫາດຊາຍ ປະເທດໂມຊຳບິກ ໃນພາກພື້ນອາຟຣິກາຕາເວັນອອກ ເມື່ອເດືອນທັນວາປີ 2015 ແລະ ເດືອນກຸມພາປີ 2016 ຜ່ານມານີ້ ຂ້ອນຂ້າງມີຄວາມແນ່ນອນວ່າ ເປັນຊິ້ນສ່ວນທີ່ມາຈາກເຮືອບິນໂດຍສານ ສາຍການບິນມາເລເຊຍ ແອຣ໌ລາຍ ຖ້ຽວບິນ MH370 ທີ່ສູນຫາຍແບບປິດສະໜາ ພ້ອມກັບຜູ້ໂດຍສານ ແລະ ລູກເຮືອລວມ 239 ຄົນ ຫລັງຈາກທີ່ຂຶ້ນບິນອອກຈາກ ສະໜາມບິນສາກົນນະຄອນຫລວງກົວລາລຳເປີ ປະເທດມາເລເຊຍ ມຸ່ງໜ້າສູ່ນະຄອນຫລວງປັກກິ່ງ ສປ ຈີນ ເມື່ອເດືອນມີນາປີ 2014.
ທ່ານ ເຊສເຕີ ຖະແຫລງວ່າ ທີມສອບສວນໄດ້ກວດສອບຊາກດັ່ງກ່າວ ແລະ ພົບວ່າ ເປັນຊິ້ນສ່ວນແຜ່ນກະດານ ຂອງເຮືອບິນໂບອິ້ງ 777 ຂອງສາຍການບິນ ມາເລເຊຍ ແອຣ໌ລາຍ ແລະ ຜົນການວິເຄາະກໍສະຫລຸບວ່າ ຊາກຊິ້ນສ່ວນທີ່ພົບ ຂ້ອນຂ້າງແນ່ນອນແລ້ວວ່າ ແມ່ນມາຈາກຖ້ຽວບິນ MH370.
