ສຳນັກຂ່າວຕ່າງປະເທດ ລາຍງານໃນວັນທີ 24 ມີນານີ້ວ່າ ທ່ານ ປຣະຍຸດ ຈັນໂອຊາ ນາຍົກລັດຖະມົນຕີ ແຫ່ງ ຣາຊະອານາຈັກໄທ ໄດ້ໃຫ້ສຳພາດ ພາຍຫລັງການພົບປະຫາລືສອງຝ່າຍ ກັບທ່ານ ຫລີເຄີສຽງ ນາຍົກລັດຖະມົນຕີ ແຫ່ງ ສາທາລະນະລັດປະຊາຊົນຈີນ ໃນລະຫວ່າງການປະຊຸມຜູ້ນຳແມ່ຂອງ-ລ້ານຊ້າງ ຄັ້ງທີ 1 ທີ່ເກາະໄຫຫລຳ ປະເທດຈີນ ໃນມື້ວານນີ້ (23 ມີນາ) ວ່າ ນອກຈາກການປຶກສາຫາລື ກ່ຽວກັບການຮ່ວມມືໃນຂອບ ແມ່ຂອງ-ລ້ານຊ້າງແລ້ວ ທັງສອງຝ່າຍຍັງໄດ້ປຶກສາຫາລື ກ່ຽວກັບການສ້າງເສັ້ນທາງລົດໄຟຄວາມໄວສູງອີກດ້ວຍ ໂດຍໄດ້ເຫັນດີໃນດ້ານຫລັກການແລ້ວວ່າ ຝ່າຍໄທຈະເປັນຜູ້ລົງທຶນດຳເນີນການເອງທຸກຂັ້ນຕອນ ແຕ່ຈະຈ້າງໃຫ້ບໍລິສັດຂອງຈີນ ມາເປັນຜູ້ກໍ່ສ້າງທາງລົດໄຟໃຫ້ແທນ ໂດຍບໍ່ມີການໃຫ້ສຳປະທານ ຫລື ຮ່ວມທຶນໃດໆກັບຈີນ.
ທັງນີ້ ເນື່ອງຈາກຝ່າຍໄທ ໄດ້ພິຈາລະນາແລ້ວວ່າ ປະເທດຕົນສາມາດສ້າງທາງລົດໄຟຄວາມໄວສູງ ໄລຍະທາງ 250 ກິໂລແມັດ ຈາກນະຄອນຫລວງບາງກອກ ເຖິງນະຄອນຣາຊະສີມາ ດ້ວຍຕົນເອງໄດ້.