ນິໂຄລ່າ ຄູຝຶກສອນຊາວເຊີເບຍ ຂໍແຍກທາງຈາກທີມລ້ານຊ້າງ ຢູໄນເຕັດ
ລາວ ພຣີເມຍລີກ 2016 ລະດູການໃຫມ່ທີ່ກໍາລັງຈະເປີດຂຶ້ນຢ່າງເປັນທາງການໃນທ້າຍອາທິດນີ້ ເກີດມີການປ່ຽນແປງຄັ້ງໃຫຍ່ໃນທີມລຸ້ນແຊ້ມຢ່າງ ລ້ານຊ້າງ ຢູໄນເຕັດ ເມື່ອລ່າສຸດມີລາຍງານວ່າ ໄດ້ແຍກທາງກັບຄູຝຶກສອນຊາວເຊີເບຍ ນິໂຄລ່າ ຄາວາໂຊວິດຊ ທີ່ຫາກໍເຂົ້າມາຮັບຕໍາແໜ່ງບໍ່ຮອດ 3 ເດືອນ.

ໂດຍທາງເຮດໂຄຊຊາວເຊີບ ໄດ້ໂພສລົງເຟສບຸກສ່ວນຕົວວ່າ “ຫຼັງຈາກຊະນະມາ 7 ນັດຕິດ, ຂ້ອຍກໍາລັງໄປຈາກລ້ານຊ້າງ ຢູໄນເຕັດ ດ້ວຍເຫດຜົນທາງຄອບຄົວ. ຂອບໃຈທຸກຝ່າຍທີ່ໃຫ້ການຮ່ວມມື ແລະ ຂໍໃຫ້ທີມປະສົບຜົນສໍາເລັດກັບເປົ້າໝາຍ. ສ່ວນຕົວຂ້ອຍຈະກັບມາເຮັດໜ້າທີ່ໃນໄວໆນີ້ ແຕ່ໃນປະເທດອື່ນ, ດ້ວຍຄວາມມຸ່ງຫວັງຢ່າງສູງສະເໝີ”