ສຳນັກຂ່າວຕ່າງປະເທດ ລາຍງານໃນວັນທີ 23 ມີນານີ້ວ່າ ມື້ວານນີ້ (22 ມີນາ) ແບນຊິກໄດ້ປະກາດໄວ້ທຸກທົ່ວປະເທດເປັນເວລາ 3 ວັນ ເພື່ອອາໄລຫາບັນດາຜູ້ເສຍຊີວິດ ພາຍຫລັງເກີດເຫດການບຸກໂຈມຕີກໍ່ການຮ້າຍທີ່ນອງເລືອດ ຢູ່ນະຄອນຫລວງບຣຸກແຊນ ໂດຍທຸກໆອົງການຈັດຕັ້ງຂອງລັດໃນທົ່ວປະເທດ ຈະຕ້ອງຫລຸດທຸງຊາດລົງເຄິ່ງເສົາ ໄປຈົນຮອດວັນທີ 24 ມີນາ.
ໃນວັນດຽວກັນ ບັນດາເຈົ້າໜ້າທີ່ແບນຊິກ ໄດ້ເຜີຍແຜ່ຮູບພາບທີ່ບັນທຶກໄດ້ຈາກກ້ອງວົງຈອນປິດ ກ່ຽວກັບຜູ້ຖືກສົງໄສ 3 ຄົນ ທີ່ເປັນເປົ້າໝາຍຖືກສົງໄສວ່າ ປະຕິບັດເຫດບຸກໂຈມຕີ ດ້ວຍລະເບີດຂ້າຕົວຕາຍ ອັນສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 34 ຄົນ ແລະ ບາດເຈັບອີກກວ່າ 250 ຄົນ.