ທ່ານ ຈ່າງ ຊ້ຽງເສີນ ລັດຖະມົນຕີຊ່ວຍວ່າການກະຊວງການຄ້າ ແຫ່ງ ສປ ຈີນ ພ້ອມຄະນະ ໄດ້ຢ້ຽມຢາມເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ ໃນວັນທີ 22 ມີນາ 2016 ທີ່ຜ່ານມາ ໂດຍການຕ້ອນຮັບຂອງທ່ານນາງ ບົວທາ ຂັດທິຍະ ລັດຖະມົນຕີຊ່ວຍວ່າການຮອງປະທານຫົວໜ້າກອງເລຂາ ຄະນະກຳມະການແຫ່ງຊາດລາວ ເພື່ອຄຸ້ມຄອງເສດຖະກິດພິເສດ ແລະ ເຂດເສດຖະກິດສະເພາະ (ຄຂພສ) ພ້ອມດ້ວຍຄະນະບໍລິຫານເຂດ ແລະ ບໍລິສັດ ຮ່ວມທຶນລາວ-ຈີນ ຈຳກັດ ທີ່ເປັນຜູ້ພັດທະນາ.
ທ່ານ ຫຼິວຫູ້ ຜູ້ອຳນວຍການບໍລິສັດ ຮ່ວມທຶນ ລາວ-ຈີນ ຈຳກັດ ໄດ້ລາຍງານໂດຍຫຍໍ້ກ່ຽວກັບເຂດພັດທະນາກວມລວມໄຊເຊດຖາ ເຊິ່ງແມ່ນເຂດພັດທະນາຮ່ວມກັນລະຫວ່າງລັດຖະບານ ສປປ ລາວ ແລະ ສປ ຈີນ ນັບແຕ່ເລີ່ມສ້າງໂຄງການເດືອນພະຈິກ 2010 ເປັນຕົ້ນມາ ລັດຖະບານທັງສອງປະເທດ ໄດ້ເອົາໃຈໃສ່ຢ່າງສະໜິດແໜ້ນຕໍ່ການພັດທະນາເຂດດັ່ງກ່າວ ໂດຍແມ່ນບໍລິສັດ ຮ່ວມທຶນລາວ-ຈີນ ຈຳກັດ ເຊິ່ງແມ່ນບໍລິສັດຮ່ວມທຸລະກິດລະຫວ່າງບໍລິສັດ ລົງທຶນຕ່າງປະເທດແຂວງຢຸນນານ ຈຳກັດ ສປ ຈີນ ແລະ ລັດຖະບານ ສປປ ລາວ ຕາງໜ້າໂດຍນະຄອນຫຼວງວຽງຈັນ ເປັນຜູ້ພັດທະນາໃນເນື້ອທີ່ 1.149 ເຮັກຕາ ຕັ້ງຢູ່ຂອບເຂດເມືອງໄຊເຊດຖາ ແລະ ເມືອງໄຊທານີ.
ຈຸດປະສົງໂຄງການເພື່ອພັດທະນາໃຫ້ເປັນເຂດຜະລິດທີ່ປະກອບມີ: ອຸດສາຫະກຳປຸງແຕ່ງຜະລິດຕະພັນກະສິກຳ ແລະ ອຸດສາຫະກຳເບົາເພື່ອສົ່ງອອກ ການສ້າງອາຄານທີ່ພັກອາໄສແບບສີວິໄລ ເຂດຂຽວ ບ່ອນພັກຜ່ອນ ທ່ອງທ່ຽວ ສູນກາງການຂົນສົ່ງ ແລະ ອື່ນໆ ໂດຍຈັດແບ່ງໂຄງການອອກເປັນ 3 ໄລຍະ ເຊິ່ງໄລຍະທຳອິດແມ່ນສຸມໃສ່ພັດທະນາພື້ນຖານໂຄງລ່າງໃນເນື້ອທີ່ຈຳນວນ 400 ກວ່າເຮັກຕາ ເຊິ່ງໄດ້ສຳເລັດການກໍ່ສ້າງໄປແລ້ວຈຳນວນໜຶ່ງ ເປັນຕົ້ນແມ່ນຖະໜົນອ້ອມຮອບ ປະຕູເຂົ້າເຂດລະບົບໄຟຟ້າ ນ້ຳປະປາ ຕຶກສຳນັກງານ ຫ້ອງວາງສະແດງຂອງໂຄງການ ມູນຄ່າການລົງທຶນ 20 ກວ່າລ້ານໂດລາສະຫະລັດ ແລະ ສາມາດດຶງດູດເອົາຫົວໜ່ວຍທຸລະກິດຕ່າງໆຈາກພາຍໃນ ແລະ ຕ່າງປະເທດເຂົ້າມາຈົດທະບຽນ ທັງໝົດ 23 ບໍລິສັດ ແລະ ໄດ້ລົງທຶນເຂົ້າໃນການກໍ່ສ້າງເພື່ອດຳເນີນກິດຈະການຂອງຕົນເອງແລ້ວ 19 ບໍລິສັດ ໂດຍມີມູນຄ່າການລົງທຶນຕາມສັນຍາ 300 ລ້ານໂດລາສະຫະລັດ ໃນຂະແໜງການຜະລິດກະສິກຳ ການກໍ່ສ້າງພະລັງງານ ຂົນສົ່ງ ແລະ ປຸງແຕ່ງ ເຊິ່ງການພັດທະນາເຂດກວມລວມໄຊເຊດຖາ ແມ່ນເປັນໄປຕາມແຜນແມ່ບົດຂອງການພັດທະນາຂອງເຂດທີ່ລັດຖະບານ ສປປ ລາວ ໄດ້ຮັບຮອງເອົາໃນເດືອນກໍລະກົດ 2013 ແລະ ບົດປະເມີນຜົນການກະທົບຕໍ່ສິ່ງແວດລ້ອມ ແລະ ສັງຄົມ ທີ່ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ອອກໃບຢັ້ງຢືນໃຫ້ເຂດພັດທະນາກວມລວມໄຊເຊດຖາ ນອກຈາກນີ້ ເພື່ອຮັບປະກັນໄດ້ເຖິງມາດຕະຖານສິ່ງແວດລ້ອມນັ້ນ ແລະ ບັນດາຫົວໜ່ວຍວິສາຫະກິດທີ່ເປັນການລົງທຶນຂະໜາດໃຫຍ່ ກໍ່ໄດ້ມີການເຮັດບົດປະເມີນຜົນກະທົບຕໍ່ສິ່ງແວດລ້ອມອີກເຊັ່ນກັນ.
ແຫລ່ງຂ່າວ:
