ຂປລ. ລັດຖະບານລາວ ໄດ້ເປີດໂອກາດໃຫ້ບັນດານັກທຸລະກິດລາວ ແລະ ອິນເດຍ ໄດ້ພົບປະ ແລະ ແລກປ່ຽນຂໍ້ມູນຂ່າວສານ ທາງດ້ານການຄ້າ-ການລົງທຶນ ແລະ ຊອກຫາຊ່ອງທາງໃນການຮ່ວມມືທາງດ້ານທຸລະກິດຮ່ວມກັນໃນອະນາຄົດ ໃນວັນທີ 21 ມີນາ 2016 ຢູ່ ນະຄອນຫລວງວຽງຈັນ.
ການພົບປະດັ່ງກ່າວ, ສະພາການຄ້າ ແລະ ອຸດສາຫະກຳຂອງອິນເດຍ ໄດ້ນຳພານັກທຸລະກິດອິນເດຍ ເຂົ້າມາ ວາງສະແດງຜົນງານ ແລະ ສິນຄ້າຢູ່ນະຄອນຫລວງວຽງຈັນ ຫລາຍກວ່າ 40 ບໍລິສັດ ເປັນຕົ້ນ ບໍລິສັດທີ່ເຮັດກ່ຽວກັບ ອຸດສາຫະກຳ, ຫັດຖະກຳ, ກົນຈັກ, ປຸງແຕ່ງ ແລະ ອື່ນໆ ເພື່ອຊອກຫາຊ່ອງທາງໃນການຄ້າຂາຍ ແລະ ການລົງທຶນ ຢູ່ ສປປ ລາວ ທັງເປັນການພົບປະສ້າງສັນ ລະຫວ່າງນັກທຸລະກິດລາວ ແລະ ອິນເດຍ ເພື່່ອແລກປ່ຽນບົດຮຽນ, ປຶກສາ ຫາລື ກ່ຽວກັບການລົງທຶນຮ່ວມກັນໃນຕໍ່ໜ້າ.
ນັກທຸລະກິດຈາກປະເທດອິນເດຍ ມີຄວາມສົນໃຈຢາກມາລົງທຶນຢູ່ ສປປ ລາວ ເນື່ອງຈາກປະເທດລາວມີທ່າ ແຮງໃນຫລາຍດ້ານ ທີ່ເໝາະສົມແກ່ການລົງທຶນ ເປັນຕົ້ນ ແມ່ນທ່າແຮງດ້ານຊັບພະຍາກອນທຳມະຊາດ, ມີສະຖຽນລະພາບທາງດ້ານການເມືອງ, ມີຄວາມສະຫງົບ, ປອດໄພ ແລະ ໄດ້ຮັບຜົນກະທົບຈາກໄພທຳມະຊາດບໍ່ຮຸນແຮງໃນ ແຕ່ລະປີ ແລະ ອື່ນໆ.
ແຫລ່ງຂ່າວ:
